मोरजी: गावडेवाडा-मोरजी येथील मार्बेला बीच रिसॉर्टमध्ये काल रात्री संगीतरजनी पार्टीचे आयोजन केले होते. या पार्टीसाठी पेडणे उपजिल्हाधिकारी कार्यालयाने रात्री दहा वाजेपर्यंत परवाना दिला असताना रात्री 10 नंतरही पार्टी सुरू राहिल्याने पोलिसांनी बंद पाडली होती. या रिसॉर्ट आता गुन्हा नोंद करण्यात आला आहे. त्यामुळे अनेक रिसॉर्ट मालकांचे धाबे दणाणले आहेत.

(A case has been registered against the Marbella Beach Resort in Morjim)

मिळालेल्या माहितीनुसार पेडणे पोलिसांनी 163/2022 पर्यावरण संरक्षण कायदा आणि ध्वनी प्रदूषण (नियमन आणि नियंत्रण) नियम कायद्याचे उल्लंघन केल्याने मोरजी येथील मार्बेला बीच रिसॉर्टवर गुन्हा दाखल केला आहे. ही कारवाई पोलीस उपअधीक्षक र. राजेश कुमार, उपविभागीय पोलीस अधिकारी पेडणे यांच्या मार्गदर्शनाखाली करण्यात आली आहे.

पोलिस प्रशासनाने याबाबत माहिती देताना म्हटले आहे की, मारबेला बीच रिसॉर्ट मालकाने मोरजी येथे दिनांक 3 डिसेंबर रोजी रात्री दहा नंतर संगीत पार्टी आयोजित केल्याचे स्पष्ट झाले आहे. निर्बंध असतानाही कार्यक्रमाचे आयोजन केले गेले. तसेच परवानगी न घेता ध्वनिप्रदूषण आणि मर्यादेपलीकडे संगीत वाजवून स्थानिकांना त्रास दिला आहे, त्यामुळे हा गुन्हा नोंद करण्यात आला आहे.