Goa Accident गोव्यात रस्ते अपघातांच्या घटनांमध्ये दिवसागणिक वाढ होत आहे. बेशिस्त पद्धतीने वाहन चालवणे, वाहतूक नियम न पाळणे अशा अनेक कारणास्तव अपघात होत आहेत. मडगाव- कारवार हमरस्त्यावर गुळे येथे पुन्हा मालवाहू ट्रक रस्त्याच्या कडेला कोसळला. या हमरस्त्याच्या टापूत वारंवार वाहने अपघातग्रस्त होत असतात.

अरूंद रस्ता व रस्त्याच्या कडेला एक इंचही जमीन नसल्याने वाहने समोरून येणाऱ्या वाहनाला बगल देताना रस्त्याच्या कडेला पलटत असतात. आज मडगावहून कारवारच्या दिशेने जाणारा एपी 21 टी ई 3699 हा मालवाहू ट्रक गुळे येथे करमल घाटाच्या पायथ्याशी रस्त्याच्या कडेला शेतात पलटला. यापूर्वी या ठिकाणी अशाच प्रकारे अनेक वाहने अपघातग्रस्त झाली आहेत.

या अपघातात कुणी जखमी झाले आहे का? तसेच अपघातग्रस्त वाहनाचे नेमके किती नुकसान झाले याची अद्याप माहिती प्राप्त होऊ शकली नाही.