Mapusa : खोब्रावाडा-कळंगुट येथे परस्पर पाडलेल्या 200 वर्षांपूर्वीच्या जुनाट वटवृक्षाचे येत्या पंधरा दिवसांत पुनर्रोपण करावे अशी मागणी करून स्‍थानिक व पर्यावरणप्रेमींनी आज सोमवारी मानवी साखळी तयार करून संबंधित बिल्डर व प्रशासनाचा निषेध नोंदविला. या वटवृक्षाच्या संवर्धनासाठी जागृती सभा कळंगुट मतदारसंघ फोरमतर्फे घेण्‍यात आली. या वृक्षाचे पंधरा दिवसांत पुनर्रोपण न केल्यास न्यायालयात जाण्याचा इशाराही यावेळी देण्‍यात आला.

गेल्या पंधरा दिवसांपूर्वी हा प्रकार घडला आहे. ज्या जागेवर वृक्ष होता, तेथे दोन प्रकल्प येताहेत. त्यामुळेच तो वटवृक्ष पाडल्याचा आरोप स्थानिकांनी केला. या घटनेनंतर दोषींवर कारवाई झालेली नाही. त्‍यामुळे संताप व्‍यक्त करण्‍यात येत आहे. फोरमचे प्रेमानंद दिवकर यांनी या प्रकाराची माहिती देऊन निषेध व्यक्त करणारी निवेदने संबंधित अधिकाऱ्यांना दिल्‍याचे सांगितले.

एकत्र लढा देणे गरजेचे : प्रजल साखरदांडे

तनुज अडवलपालकर, वॉल्टर लोबो तसेच इतर वक्त्यांनी यावेळी घटनेचा निषेध व्यक्त करीत मनोगत व्यक्त केले. यात प्रा. प्रजल साखरदांडे, फोरमचे संयोजक प्रेमानंद दिवकर तसेच मान्यवर सहभागी झाले होते. सर्व लोकांनी एकत्रित येऊन हे बेकायदेशीर प्रकार थांबविण्यासाठी पुढे यावे, असे आवाहन साखरदांडे यांनी केले.