फातोर्डा येथील हाऊसिंग बोर्ड येथे क्रिकेटचा खेळ एका 15 वर्षीय मुलाच्या जीवावर बेतल्याची घटना घडली आहे. ही दुर्देवी घटना रविवारी सकाळी 8 वाजण्याच्या दरम्यान घडली. या घटनेने परिसरात हळहळ व्यक्त होत आहे. फाताेर्डा पोलिसांनी या घटनेची अनैसर्गिक मृत्यू म्हणून नोंद केली आहे.

याबाबत अधिक माहिती अशी की, क्रिकेट खेळताना चेंडू छप्परावर पडला होता तो काढताना घसरुन पडल्याने एका 15 वर्षीय मुलाचा मृत्यू झाल्याची दुर्देवी घटना आज हाऊसिंग बोर्ड येथे घडली. ही घटना रविवारी सकाळी 8 वाजण्याच्या सुमारास घडली.

हाऊसिंग बोर्ड येथे काही मुले क्रिकेट खेळत होती. यावेळी एकाने चेंडूचा मारलेला फटका समोर असलेल्या एका हायस्कुलच्या छप्परावर गेला आणि चेंडू तेथेच अडकून पडला. तो चेंडू काढण्यासाठी एक 15 वर्षीय मुलगा छप्परावर गेला. त्याने तो चेंडू काढण्याचा प्रयत्न केला.

मात्र, छप्परावरील पत्रे फायबरचे असल्याने त्याचा पाय तेथे अडकला. त्याने सुटकेसाठी प्रयत्न केले. यावेळी त्याचा पाय घसरल्याने तो खाली पडला व गंभीर जखमी झाला. गंभीर जखमी मुलाला दक्षिण गोवा जिल्हा रुग्णालयात नेले असता तेथील डाॅक्टरांनी त्याला मृत घोषीत केले. सोहेल शेख असे मृत मुलाचे नाव आहे.

फाताेर्डा पोलिसांनी या घटनेची अनैसर्गिक मृत्यू म्हणून नोंद केली आहे. पोलिस निरीक्षक दितेंद्र नाईक यांच्या मार्गदर्शनाखाली उपनिरिक्षक अमिन नाईक पुढील तपास करीत आहेत. पोलिसांनी कायदेशीर सोपास्कार करुन मृतदेह मृत मुलाच्या कुटुंबियाच्या स्वाधीन केला.