Goa Drug Case: हडफडे येथे ड्रग्सविरोधी कक्षाच्या (एएनसी) पथकाने छापा टाकून गुन्हेगारी पार्श्‍वभूमी असलेला नायजेरियन ड्रग डिलर इनोसेंट ओकेझूयुनू आनेमेम (वय 56वर्षे) याला अटक केली. त्याच्याकडून कोकेन, एक्स्टसी पावडर व चरस मिळून सुमारे 75 लाखांचे ड्रग्स जप्त केले.

2013 साली पर्वरी महामार्ग अडविला तसेच बेकायदा वास्तव्य अशा प्रकऱणांत त्याला अटक झाली होती, अशी माहिती पोलिस उपअधीक्षक नेर्लोन अल्बुकर्क यांनी दिली.

किनारपट्टी भागात एक नायजेरियन ड्रग्स व्यवसायात सक्रिय असल्याची माहिती मिळाली होती. त्यानुसार गेल्या काही दिवसांपासून पोलिसांनी या भागात रात्रीच्या वेळी पाळत ठेवली होती. शनिवारी रात्री दुचाकीवरून संशयास्पदरित्या फिरणाऱ्या नायजेरियन इनोसेंट ओकेझुयुनू याला हडफडे येथे ताब्यात घेण्यात आले.

झडती घेतली, तेव्हा त्याच्याकडे ४८९ ग्रॅम कोकेन, ज्याची किंमत आंतरराष्ट्रीय बाजारात सुमारे ७२ लाख रुपये आहे. शिवाय १५ ग्रॅम एक्स्टसी पावडर आणि २५९ ग्रॅम चरस सापडला. या सर्व ड्रग्सची किंमत ७४.७५ लाख रुपये आहे. ही कारवाई अधीक्षक बॉस्युएट सिल्वा यांच्या मार्गदर्शनाखाली करण्यात आली.

तीन गुन्हे दाखल

संशयिताविरुद्ध यापूर्वी ३ गुन्हे दाखल आहेत. २०१३ मध्ये एका नायजेरियनचा खून झाला होता. त्यावेळी गोव्यातील नायजेरियन्सनी एकत्र येऊन पर्वरीतील राष्ट्रीय महामार्ग अडविला होता. तेव्हा काहीजणांना अटक झाली, त्यात त्याचा समावेश होता. गोव्यात बेकायदा वास्तव्य केल्याने त्याला म्हापसा येथील बंदिस्त केंद्रात ठेवले होते.