जुने गोवा येथील दिव्यांग मुलांसाठी केंद्रात दाखल असलेल्या सात वर्षांच्या दिव्यांग मुलीचा सोमवारी बाथटबमध्ये पडून मृत्यू झालाय. सदर घटनेसंबंधी पोलीसांकडून असे सांगण्यात आले की, जुने गोवा येथील सेंट झेवियर्स ट्रेनिंग कम प्रॉडक्शन सेंटर फॉर चिल्ड्रन विथ डिसॅबिलिटीज येथे रविवारी सायंकाळी 5 वाजण्याच्या सुमारास केंद्रातील दिव्यांग मुले अंघोळीसाठी जात असताना ही दुर्दैवी घटना घडली. (Old Goa)

या घटनेसंबंधीची चौकशी उपविभागीय दंडाधिकाऱ्यांमार्फत होणार असून जुने गोवा पोलीस या प्रकरणाच्या संदर्भात एफआयआर दाखल करण्याच्या प्रक्रियेत असल्याची माहिती जुने गोवा पोलीस ठाण्यातील वरिष्ठांकडून देण्यात आली आहे.

तर या घटनेसंबंधी या केंद्राच्या व्यवस्थापनाने सांगितले की, येथील कर्मचारी पाणी आणण्यासाठी बाहेर गेले असताना ही दुर्दैवी घटना घडली. या मुलीला प्राथमिक उपचाराकरिता खासगी रुग्णालयात दाखल करण्यात आले.

मात्र ती 79 टक्के भाजल्याने तिला अधिक उपचारासाठी गोवा वैद्यकीय महाविद्यालय आणि रुग्णालयात नेण्यात आले. तिच्यावर उपचार सुरु असताना सोमवारी पहाटे 2 वाजता तिचा दुर्दैवी मृत्यू झाला.