Goa Government Schools: धारबांदोडा तालुक्यात सध्या ५० सरकारी प्राथमिक शाळा सुरू आहेत. त्यापैकी ७ शाळा विद्यार्थ्यांच्या पटसंख्येअभावी यंदाच्या वर्षी बंद पडण्याच्या मार्गावर असल्याने चिंता व्यक्त करण्यात येत आहे.

धारबांदोडा तालुक्यातील जीर्ण झालेल्या सर्वच शाळा इमारतींचे लाखो रुपये खर्च करून नूतनीकरण करण्यात आले असले, तरी वेळीपवाडा, वाकीकुळण, माटोजे, सांतोण व कळसय या शाळांमध्ये विद्यार्थ्यांची संख्या कमी असल्याने या शाळा बंद पडण्याच्या स्थितीत आहेत.

साकोर्डा येथील उधळशे व पानसवाडा या गावांतील शाळा सध्या एकही विद्यार्थी नसल्याने त्या बंद होणार हे नक्की आहे. बंद पडण्याच्या स्थितीत असलेल्या या शाळा वाचवायच्या असल्यास ग्रामस्थांनी प्रयत्न करणे गरजेचे आहे.

गतवर्षी साकोर्डा पंचायत क्षेत्रातील मुर्गे व धारगे या शाळा विद्यार्थ्यांची संख्या कमी असल्याने बंद करण्यात आल्या होत्या. सध्या या गावातील प्राथमिक विद्यार्थी बोळकर्णे व तांबडीसुर्ला येथील शाळेत जात आहेत.

मुर्गे व धारगे गावातून या विद्यार्थ्यांना जाताना ३ ते ४ किलोमीटर पायी प्रवास करावा लागतो. सरकारने या विद्यार्थ्यांसाठी वाहतुकीची सोय करावी किंवा कोणत्या गावातील शाळांत विद्यार्थी संख्या जास्त आहे ते पाहून सरकारने बंद केलेल्या प्राथमिक शाळा चालू कराव्यात. - दिना गावकर, माजी सरपंच, साकोर्डा