वास्को: बायणा समुद्रकिनारी झालेल्‍या उमेश हरिजन (33) याच्‍या हत्येप्रकरणी अटक करण्यात आलेले दोघे आरोपी अमीर हुसेन आणि दीपक सहानी यांना मंगळवारी वास्को पोलिसांनी न्‍यायालयासमोर उभे केले असता त्यांना 7 दिवसांची पोलीस कोठडी सुनावण्यात आली. वास्को पोलीस आणखी तीन आरोपींचा शोध घेत असून, त्‍यांना पकडण्यासाठी ठिकठिकाणी नाकाबंदी सुरू केले आहे. उमेश याने दीड वर्षांपूर्वी चार संशयितांपैकी एकाच्या भावाला मारहाण केली होती. तो राग मनात ठेवून ‘त्या’ चौघांनी सोमवारी दुपारी डाव साधला, अशी माहिती पोलिसांनी दिली आहे.

(7 days police custody for both in Harijan murder case)

शवचिकित्‍सा अहवालानुसार हत्‍यारांनी वार केल्‍याने फुफ्फुसाला जखमा होऊन मृत्‍यू झाला. याबाबत वास्को उपविभागाचे पोलीस उपअधीक्षक राजेश कुमार यांनी माहिती दिली. काटेबायणा येथे सोमवारी भर दुपारी चौघांनी कोयता व चाकूने सपासप वार करून उमेश हरिजन (३०, रा. हाऊसिंग कॉलनी, बायणा) या तरुणाची निर्घृण हत्या केली. पूर्ववैमनस्यातून हा प्रकार घडला. चार संशयितांपैकी दोघांना फोंडा पोलिसांनी पाठलाग करून पकडले आणि मुरगाव पोलिसांच्या ताब्यात दिले. दीपक सहानी आणि अमिर अशी या संशयितांची नावे आहेत.

हिस्ट्री शीटर्स, रोडरोमिओ यांची तपासणी

दरम्यान, वास्को पोलिसांनी बायणा आणि मांगोरहील परिसरात आज गस्त कायम ठेवली आणि काल बायणा येथे झालेल्या हत्येच्या पार्श्वभूमीवर हिस्ट्री शीटर्स आणि रोडरोमीयो यांना तपासले. सर्वांना ताकीद देण्यात आली आहे.

असा रचला डाव

उमेश हा सोमवारी दुपारी तीनच्या सुमारास बायणातील सार्वजनिक गणेशोत्सव मंडपात आला होता. तेथे श्रींचे दर्शन घेऊन महापूजेचा महाप्रसाद घेऊन निघाला होता.

त्याच्यासोबत मित्र अशोक चलवादी होता. ते काटेबायणा येथील उड्डाणपुलाजवळ पोहोचले असता तेथे दबा धरून बसलेल्या चौघांनी त्यांना अडविले व उमेशला उड्डाण पुलाखाली नेले.

तेथे उमेशवर कोयता आणि चाकूने हल्ला करण्यात आला. या हल्ल्यात उमेश गंभीर जखमी झाला. हा प्रकार घडत असताना अशोकने उमेशच्या भावाला माहिती दिली.

भाऊ विजय तेथे कार घेऊन येईपर्यंत हल्लेखोरांनी घटनास्थळाहून पळ काढला. उमेशला उपचारासाठी चिखली उपजिल्हा इस्पितळात नेण्यात आले. परंतु तेथील डॉक्टरांनी मृत घोषित केले.