Goa Police: पोलिस खात्यातील 28 उपअधीक्षक पदांसाठी आता केवळ 62 उमेदवार शारीरिक क्षमता चाचणीसाठी पात्र ठरले आहेत. निवडणुकांमुळे शारीरिक चाचणी घेण्यास गोवा लोकसेवा आयोगाला केंद्रीय औद्योगिक सुरक्षा दलाने नकार दिल्याने आता तज्ज्ञांकरवी आयोगच ही चाचणी घेणार आहे.

25 वर्षांच्या खंडानंतर थेट पद्धतीने पोलिस उपअधीक्षक पदे भरण्यात येत असल्याने त्याकडे सर्वांचे लक्ष लागून राहिले आहे. आयोगाचे अध्यक्ष जुझे मान्युएल नरोन्हा यांनी दिलेल्या माहितीनुसार, या पदांसाठी 2 हजार 400 जणांनी अर्ज केले होते.

त्यापैकी केवळ 1 हजार 850 जण भरतीपूर्व चाचणीला सामोरे गेले. त्यापैकी 93 जण संगणकावर आधारीत परीक्षेसाठी पात्र ठरले होते.

त्यांनी काल रविवारी ही परीक्षा दिली आणि त्यापैकी केवळ 62 उमेदवार शारीरिक चाचणीसाठी पात्र ठरले आहेत.

इंग्रजी, मानवाधिकार, धोरणे, इतिहास, भूगोल, तर्कशास्त्र याविषयावर आधारीत संगणकीकृत प्रश्न 75 गुणांसाठी विचारले होते आणि उत्तरे देण्यासाठी 90 मिनिटांचा कालावधी दिला होता.