Savordem Sattari: झाडाची छाटणी करण्यासाठी गेलेला व्यक्ती 15 मीटर झाडावर अडकून पडला. या व्यक्तीला झाडावरुन खाली उतरविण्यासाठी तब्बल दोन तास बचावकार्य चालले. सावर्डे, सत्तरीत मंगळवारी दुपारी ही घटना घडली.

वयाच्या साठीत असणारे फटो माईणकर झाडे कापण्यात तरबेज आहेत. मंगळवारी दुपारी ते सावर्डेत तार झाडावर छाटणीसाठी चढले. छाटणी करता करता फटो 15 मीटर उंचीवर गेले पण, तिथेच अडकून पडले. त्यांनी खाली उतरण्याचा प्रयत्न केला पण त्यांचा प्रयत्न अयशस्वी झाला.

दरम्यान, परिस्थिती लक्षात घेता वाळपई अग्निशामक दलाच्या जवानांना पाचारण करण्यात आले. जवान आल्यानंतर फटो यांना खाली उतरविण्याचे प्रयत्न सुरु झाले.

तब्बल दोन तास शर्थीचे प्रयत्न केल्यानंतर फटो यांना खाली उतरविण्यात आले. अग्निशामक दलाच्या जवानांनी शिडीच्या मदतीने फटो यांना खाली घेतले.

खाली आल्यानंतर फटो बेशुद्ध अवस्थेत होते, प्रथमोपचार करुन त्यांना शुद्धीवर आणण्यात आले. दरम्यान, पुढील उपचारासाठी त्यांना सरकारी रुग्णालयात दाखल करण्यात आले आहे.