डिचोली, गेल्या जवळपास पंधरा दिवसांपासून मुसळधार पावसाचा कहर सुरू असून, या पावसाचा शेतकरी आणि बागायतदारांना मोठा फटका बसला आहे. सततधार पडणाऱ्या पावसामुळे डिचोलीत बहुतांश भागात भातशेती पूर्णपणे पाण्याखाली गेली असून, काही भागात बागायतींनाही पावसाचा फटका बसला आहे.

डिचोली विभागीय कृषी कार्यालयाकडून प्राप्त माहितीनुसार पावसाच्या तडाख्यामुळे डिचोलीत जवळपास ६० हेक्टर भातशेती, तर १० हेक्टर बागायतींची नासाडी झाली आहे.

यंदा मॉन्सून वेळेवर सक्रिय झाल्यामुळे बळीराजा मोठ्या उमेदीने शेतीत उतरून शेतकामात मग्न झाला होता. पेरणी आणि तरवा लागवडीच्या कामावर शेतकऱ्यांनी लक्ष केंद्रीत केले असतानाच, पावसाचा धुमाकूळ सुरू झाला. मुसळधार पावसामुळे मये, पिळगाव, शिरगाव, साळ, मेणकूरे आदी भागातील भातशेती पाण्याखाली गेली.

आठवडाभर शेती पाण्याखाली राहिल्याने लावणीसाठी तयार झालेला तरवा कुजून गेल्या, केलेली पेरणीही वाया गेली. त्यामुळे शेतकऱ्यांची मेहनत आणि पैसे वाया गेले आहेत. अजूनही शेती पाण्याखाली आहेत.

पावसाच्या कहरामुळे शेतकऱ्यांची चिंता वाढली आहे. भातशेतीसह कुळागरे,बागायतींनाही तडाखा बसला आहे. अडवलपाल, नार्वे, वाठादेव आदी भागातील मिळून जवळपास १० हेक्टर बागायती पिकाची हानी झाली आहे.

सध्याच्या पाहणीनुसार पाण्याखाली गेल्याने जवळपास ६०हेक्टर शेती तर १० हेक्टर बागायती पिकाला नुकसानीचा तडाखा बसला आहे. पावसाचा तडाखा बसलेल्या भागात पाहणी करण्यात येत आहे. मये, शिरगाव भागात पाहणीवेळी आमदार प्रेमेंद्र शेट हे उपस्थित होते. शेतकरी, बागायतदार संपर्क साधतात, त्याप्रमाणे कृषी अधिकारी शेती, बागायतींची पाहणी करतात. शेती, बागायतीच्या नुकसानींचा अहवाल तयार करण्यात येत आहे.

-दीपक गडेकर, सहायक कृषी अधिकारी, डिचोली