37th National Games : पणजी, गोव्यात सध्या पडणाऱ्या परतीच्या पावसाचे सावट ३७व्या राष्ट्रीय क्रीडा स्पर्धेवर आहे.

पावसाचा फटका बाह्य मैदानावरील (आऊटडोअर) खेळांवर होण्याची शक्यता आहे, मात्र अशा स्पर्धास्थळी चिखल होणार नाही किंवा जागा खराब होणार नाही याची खबरदारी घेतली जाईल, अशी माहिती क्रीडामंत्री गोविंद गावडे यांनी बुधवारी दिली.

क्रीडामंत्र्यांनी फोंडा क्रीड संकुला, तसेच तिरंदाजी स्पर्धेचे केंद्र असलेल्या फर्मागुढी येथील गोवा अभियांत्रिकी मैदान परिसराची पाहणी केली. फोंड्यातील आऊटडोअर खेळांना पावसाचा फटका बसण्याची शक्यता आहे.

फर्मागुढी येथील पाहणीनंतर क्रीडामंत्री म्हणाले, की ‘‘त्रुटी राहू नयेत यासाठी आम्ही ही पाहणी केली. २९ ऑक्टोबर रोजी तिरंदाजी स्पर्धा या ठिकाणी होणार आहेत.

हा खुल्या मैदानातील खेळ असून अलीकडे काही पावसाच्या सरी कोसळल्या आहेत. पार्किंग, प्रसाधनगृह कक्ष, महनीय व्यक्तींचे कक्ष, क्रीडापटूंचे कक्ष, जर्मन हँगर्स तज्ञत्रानाचे तंबू आदींची तयारी करण्यात आली आहे. २६ ऑक्टोबरपर्यंत या ठिकाणी सर्व तयारी पूर्ण होईल.

येथील स्पर्धा केंद्रांची अगोदर तालीम घेणार असून, कोणतीही अडचण दूर करण्यास ४८ तास मिळतील. पाऊस पडला तरी या ठिकाणी चिखल होणार नाही अथवा जागा खराब होणार नाही, याची दक्षता आम्ही घेणार आहोत.’’

खो-खो स्पर्धा फोंड्यातील क्रीडा संकुलात होणार आहे. खो-खो स्पर्धा आऊटडोअर आहे. याठिकाणी पाण्याचा निचरा होण्यासाठी योग्य उपाययोजना असेल, तसेच आच्छादनही उपलब्ध केले जाईल, असे क्रीडामंत्र्यांनी सांगितले.

२९ ऑक्टोबर ते आठ नोव्हेंबर या कालावधीत खो-खो स्पर्धा खेळली जाईल. याशिवाय मॉडर्न पेंटॅथलॉन आणि तायक्वांदो हे खेळही फोंडा क्रीडा संकुलात होतील.

या ठिकाणच्या सर्व पायाभूत सुविधा स्पर्धा सुरू होण्यास ४८ तास अगोदर सुसज्ज असतील असा विश्वास त्यांनी व्यक्त केला.

खुल्या जागेतील खेळ आसन व्यवस्थेविना

तिरंदाजीसारखे खेळ खुल्या मैदानावर होत असल्याने याठिकाणी प्रेक्षकांच्या आसन व्यवस्थेवर निर्बंध नसेल, असे क्रीडामंत्री गावडे यांनी स्पष्ट केले. खुल्या मैदानावरील स्पर्धांसाठी काही जागा विद्यार्थ्यांसाठी राखीव असेल.

मात्र इतर प्रेक्षकांसाठी आसनव्यवस्था नसेल. कितीही प्रेक्षक या खेळांचा आनंद लुटू शकतील, असे क्रीडामंत्री म्हणाले.

फोंड्यातील इनडोअर क्रीडा संकुलात एकूण आसनव्यवस्था ४५० जणांची असेल, त्यापैकी ५० टक्के आसने विद्यार्थ्यांसाठी, २० टक्के आसने क्रीडापटू व तांत्रिक अधिकाऱ्यांसाठी आरक्षित असतील, असे क्रीडामंत्र्यांनी सांगितले.

खो-खो इनडोअर मैदानात? : जोरदार पावसामुळे खो-खो मैदान खराब होण्याचा धोका आहे. त्यामुळे आम्ही पर्यायी विचार करत आहोत, असे क्रीडामंत्री गावडे म्हणाले.

पारंपरिक पद्धतीने खो-खो स्पर्धा खुल्या मैदानात घेण्याचे ठरले आहे, मात्र पावसाचा जोर कायम राहिल्यास उभारलेल्या तंबूत (इनडोअर) स्पर्धा घेण्याबाबत निर्णय होऊ शकतो, असे क्रीडामंत्र्यांनी नमूद केले.