Goa GST : गोव्याला केंद्र सरकारच्या अर्थखात्याकडून वस्तू सेवा करापोटी (जीएसटी) ऑगस्ट 2022 ची भरपाई म्हणून 376 कोटी रुपये मिळाले आहेत. ऑगस्ट 2021 च्या तुलनेत यावर्षीच्या ऑगस्टची भरपाई ही 32 टक्क्यांनी जास्त आहे. ऑगस्ट 2022 मध्ये देशभरातून जीएसटी महसूल 1 लाख 43 हजार 612 कोटी रुपये आहे. ज्यापैकी सीजीएसटी 24 हजार 710 कोटी आहे. एसजीएसटी 30 हजार 951 कोटी आणि आयजीएसटी 77 हजार 782 कोटी रुपये आहे.

वस्तू आणि सेवा कर (जीएसटी) संकलनाने ऑगस्टमध्ये वार्षिक 28 टक्के वाढ नोंदवत 1.44 लाख कोटी रुपयांचा टप्पा गाठला असल्याचे केंद्रीय अर्थ मंत्रालयाने स्पष्ट केले आहे. जीएसटी परिषदेने राबवलेल्या केलेल्या विविध उपाययोजनांचा हा परिणाम आहे. अर्थव्यवस्था वेगाने प्रगती करत असल्याने जीएसटी महसुलावरही सकारात्मक परिणाम होत आहे, असेही वित्त मंत्रालयाने म्हटले आहे.

यंदाच्या जुलैमध्ये जमा झालेल्या 1.49 लाख कोटी रुपयांच्या तुलनेत ऑगस्टमधील करसंकलन चार टक्के कमी आहे. सर्वाधिक विक्रमी करसंकलन एप्रिलमध्ये 1.67 लाख कोटी रुपये झाले होते. ऑगस्ट 2021 मधील 1,12,020 लाख कोटी संकलनापेक्षा या ऑगस्टमध्ये 28 टक्के अधिक करसंकलन झाले आहे, असे अर्थ मंत्रालयाने जारी केलेल्या निवेदनात म्हटले आहे.

ऑगस्टमधील जीएसटी संकलन 1.44 लाख कोटी रुपये झाले असून हे संकलन 1.40 कोटींपेक्षा जास्त असण्याची ही सलग सहावी वेळ आहे. अर्थात जुलैपेक्षा ही रक्कम चार टक्के कमी झाली आहे. एप्रिलपासून आतापर्यंत वस्तू व सेवा कराचे 7.46 लाख कोटी रुपये जमा झाले आहेत.