झुआरीनगर येथे एमईएस कॉलेजमध्ये एका वर्गाचे सिलींग कोसळून तीन विद्यार्थिनी जखमी झाल्या. जखमी विद्यार्थिनींना तातडीने १०८ रुग्णवाहिकेतून चिखली येथे उपजिल्हा इस्पितळात उपचारांसाठी नेले. उपचार केल्यानंतर त्यांना घरी पाठविण्यात आले.

सूत्रांकडून मिळालेल्या माहितीनुसार, आज सकाळी १०.३० वाजता सोसाट्याचा वारा आणि मुसळधार पावसामुळे एमईएस कॉलेजच्या प्रथम वर्ष वाणिज्य शाखेच्या एका वर्गातील सिलिंगचा काही भाग अचानक कोसळला. यावेळी वर्ग सुरू होता. सिलिंगचे हे तुकडे वर्गात बसलेल्या तीन मुलींवर कोसळल्याने त्या जखमी झाल्या. त्यापैकी भयभीत झाल्याने एका मुलीला चक्कर आली आणि ती बेशुद्ध पडली. यावेळी शिक्षक आणि विद्यार्थ्यांची भंबेरी उडाली. शिक्षकांनी विद्यार्थ्यांना तातडीने वर्गाबाहेर नेले.

या दुर्घटनेविषयी एमईएस कॉलेजच्या उपप्राचार्य रोचना खरंगटे यांना विचारले असता, त्यांनी क्लास रूममधील सिलिंगच्या ‘पीओपी’चा काही भाग कोसळला असल्याचे सांगितले. आम्ही विद्यार्थ्यांना लगेच बाहेर काढले.