पणजी: गोव्यात सर्वत्र आगामी विधानसभा निवडणुकीची रणधुमाळी सुरू आहे. सर्वच राजकीय पक्ष विविध माध्यमातून जोरदार प्रचार करत आहेत. यातच आता निवडणूक अर्ज दाखल करण्याची प्रक्रिया सुरू झाली आहे. निवडणूक आयोगाच्या माहितीनुसार, 21 जानेवारी ते 28 जानेवरी हा अर्ज दाखल करण्याचा कालावधी आहे. पहिल्या दिवशी 3 लोकांनी अर्ज दाखल केले आहेत. यामध्ये मंत्री नीलेश काब्राल यांचा देखील समावेश आहे. (Goa Assembly Election 2022)

निवडणुकीच्या (Election) वेळापत्रकाची अधिसूचना जारी झाल्याने शुक्रवारी उमेदवारी अर्ज भरण्याची प्रक्रिया सुरू झाली. पहिल्या दिवशी दक्षिण गोव्यात (South Goa) एकूण तीन उमेदवारी अर्ज दाखल झाले. भाजपच्या तिकिटावर निवडणूक लढवणाऱ्या काब्राल यांनी कुडचडे मतदारसंघातून उमेदवारी दाखल केली. माजी मंत्री गोविंद गावडे यांनी प्रियोळ विधानसभा मतदारसंघातून भाजपच्या चिन्हावर उमेदवारी दाखल केली. तसेच अपक्ष उमेदवार दिग्विजय चौहान यांनी नावेली मतदारसंघातून उमेदवारी दाखल केली.

19 मतदारसंघांचा समावेश असलेल्या उत्तर गोव्यातून (North Goa) अजून एकही अर्ज आलेला नाही. मुख्य निवडणूक अधिकारी कुणाल म्हणाले, निवडणूक आयोगाने ‘KYC’ नावाचे नवीन अ‍ॅप लॉन्च केले आहे.या अ‍ॅपवर उमेदवारांशी संबंधित सर्व माहिती उपलब्ध आहे. यामध्ये त्यांचे प्रतिज्ञापत्र आणि गुन्हेगारी नोंदींसह अनेक गोष्टींचा समावेश आहे.

उमेदवारी अर्ज भरण्याची अंतिम तारीख 28 जानेवारी आहे. अर्जांची छाननी 29 जानेवारीला होईल तर उमेदवारांकडून अर्ज मागे घेण्याची प्रक्रिया 31 जानेवारीला होईल. गोव्यात 40 मतदारसंघांसाठी 14 फेब्रुवारी रोजी निवडणूक होणार आहे.