Vasco narcotic Raid: अवैध ड्रग्ज प्रकरणांनी गोव्याची प्रतिमा जागतिक पातळीवर मलिन होत असल्याने सरकारची डोकेदुखी वाढली आहे. वास्कोमध्ये टाकलेल्या छाप्यात एक किलो अवैध गांजा जप्त करण्यात आला असल्याची माहिती पोलिसांनी दिली आहे.

माहितीनुसार, अवैधरीत्या ड्रग्ज पुरवठा होत असल्याची टीप पोलिसांना मिळाली होती. दरम्यान अमली पदार्थ विरोधी पथकाने सापळा रचत 23 वर्षीय रोहन सरोज याला ताब्यात घेतले आहे. रोहन हा मूळचा नवे वाड्डे येथील राहणारा असून त्याच्याकडून पोलिसांनी 1 लाख किमतीचा 1 किलो गांजा जप्त केला आहे.

पोलीस संबंधित घटनेत अजून कुणाचा सहभाग आहे का ते याचा तपास करत आहेत.

दरम्यान, राज्यातील ड्रग्ज विक्रेते तसेच दलालांना लक्ष्य करून त्यांच्याविरुद्ध कठोर कारवाई करण्याबाबत सरकार ठाम आहे. राज्यातील अंमलीपदार्थांच्‍या तस्करीला आळा घालण्यासाठी पोलिस यंत्रणा सक्रिय झाली असल्यानेच गुन्ह्यांचे प्रमाण यावर्षी कमी झाले आहे.

सरकार अंमलीपदार्थ झिरो टॉलरन्स धोरणाच्या वचनबद्धतेवर ठाम आहे. नशामुक्त समाज घडवण्यासाठी संघटितपणे प्रयत्न करूया, असे मत मुख्यमंत्री डॉ. प्रमोद सावंत यांनी काल आंतरराष्ट्रीय अंमलीपदार्थविरोधी दिनानिमित्त व्यक्त केले.