पणजी: वेश्या व्यवसायातून २१.२ कोटी रुपयांचा गल्ला गोळा करणाऱ्या संशयित केनियन नागरिक न्यूटन मुथुरी किमानी याला ईडीने अटक केली होती. याप्रकरणी संशयित न्यूटन याने म्हापसा न्यायालयात केलेला जामीन अर्ज फेटाळल्यानंतर, आता त्याने जामिनासाठी गोवास्थित उच्च न्यायालयात धाव घेतली आहे. याबाबत पुढील सुनावणी २४ मार्च रोजी होणार आहे.

हणजूण परिसरात पोलिसांनी वेश्या व्यवसायप्रकरणी दोन महिला दलालांना अटक केली होती. यावेळी पोलिसांनी सात महिलांची सुटका देखील करण्यात आली होती. यात हवाला आणि मनी लाँड्रिंग संशय असल्याची ईडीने ९ डिसेंबर २०२३ रोजी न्यूटन मुथुरी किमानी याला अटक केली होती. न्यूटन मायदेशी पळून जाण्याच्या तयारीत असताना दिल्ली विमानतळावर त्याला अटक करण्यात आली होती.

पोलिसांनी याप्रकरणात इस्त्रालीट आणि विल्किस्टा अशा दोन महिलांना अटक केली होती. न्यूटनकडे इस्त्रालीट आणि विल्किस्टा यांच्याकडून मिळणाऱ्या पैसे हाताळण्याची जबाबदारी होती. यासाठी त्याने पंजाब आणि बंगळुरु येथे विविध बँकेत ११ खाती उघडल्याची माहिती आहे. या खात्यांमध्ये वेश्या व्यवसायातून कमवलेले पैसे जमा होत होते.

वेश्या व्यवसायातून सुमारे २१.२ कोटी रुपये गोळा करण्यात आले, न्यूटनने एजंटमार्फत ३.४ कोटी रुपये केनियात पाठवल्याची माहिती समोर आली आहे. दरम्यान, ईडीने याप्रकरणी तपासपूर्ण करुन इस्त्रालीट, विल्किस्टा आणि न्यूटन यांच्यासह फरार हेलन जेम्स विरोधात आरोपपत्र दाखल केले आहे.