पणजी : जुने गोवे येथील एका अनाथाश्रमात 20 वर्षीय मुलाने आत्महत्या केल्याची धक्कादायक घटना घडली आहे. गेल्या दोन वर्षांतील याच संस्थेतील आत्महत्येची ही दुसरी घटना आहे. त्याच्या या आत्महत्येमुळे अनाथाश्रमातील कर्मचाऱ्यांवर संशय व्यक्त होत आहे. पोलिस तपास सुरू आहे. जुने गोवा पोलिस सूत्रांनी सांगितले की, बुधवारी संध्याकाळच्या सुमारास अनाथाश्रमातील खोलीमध्ये लटकलेल्या अवस्थेत हा मुलगा आढळून आला. (20-year-old boy commits suicide in Goa orphanage)

त्याची माहिती पोलिसांना दिल्यानंतर घटनास्थळी जाऊन त्याचा पंचनामा करण्यात आला. पोलिसांनी अनैसर्गिक मृत्यूची नोंद केली आहे. या मुलाने कठोर पाऊल उचलण्यामागील कारण शोधण्यासाठी तपास सुरू केला आहे. गोवा वैद्यकीय महाविद्यालय रूग्णालयात व उपजिल्हाधिकारी आणि दोन साक्षीदारांसह इतर अधिकाऱ्यांच्या उपस्थितीत मृतदेहाची तपासणी करण्यात आली आहे. येत्या शुक्रवारी मृतदेहाचे शवविच्छेदन करण्यात येणार असल्याचे पोलिसांनी सांगितले.