काणकोण: गालजीबाग व आगोंद सागरी कासवसंवर्धन केंद्रातून आतापर्यंत 193 ऑलिव्ह रिडले कासवांची पिल्ले समुद्रात सोडण्‍यात आली आहेत. या दोन्‍ही किनाऱ्यांवरील 20 सागरी कासवांचे आगमन होऊन त्यांनी 2049 अंडी घातली आहेत.

गालजीबाग येथील एका घरट्यातून 118 अंड्यांपैकी 54 अंड्यांतून पिल्ले बाहेर आली. त्‍यांना काल 26 रोजी समुद्रात सोडण्यात आले. उर्वरित अंड्यांतून पिल्ले बाहेर येण्याची प्रतीक्षा असल्याचे वन खात्याच्या वन्यप्राणी विभागाचे

खोतीगाव अभयारण्याचे क्षेत्रीय वनाधिकारी अनंत वेळीप यांनी सांगितले.

अंडी घातल्यानंतर अंड्यांतून पिल्ले बाहेर येण्यास 45 ते 60 दिवसांचा कालावधी लागतो. किनाऱ्यावरील तापमान व अन्य हवामान विषयक घटकावर ते अवलंबून असते, असे वेळीप म्‍हणाले. घरट्यातून पिल्ले बाहेर आलेली पाहताना व ती समुद्रात सोडताना पाहण्यासाठी आगोंद व गालजीबाग किनाऱ्यावर देशी व परदेशी पर्यटकांची गर्दी उसळतआहे.

त्याचा फायदा घेऊन पर्यटन व वन खात्याने संयुक्तपणे सागरी कासव महोत्सव गालजीबाग, आगोंद तसेच मोरजी येथे आयोजित करून ‘इको टुरिझम’ पर्यटनाला चालना द्यावी अशी मागणी होत आहे.