Goa Revenue Collection and Capital Expenditure

पणजी: गोव्याचे मुख्यमंत्री डॉ. प्रमोद सावंत यांनी दिलेल्या माहितीनुसार मागील आर्थिक वर्षाच्या तुलनेत यंदाच्या वर्षी राज्यातील महसूल संकलनात (Revenue Collection) १८ टक्के तर भांडवली खर्चात ( Capital Expenditure) २९ टक्क्यांची वाढ झाली आहे.

रविवारी (दि. २७ ऑक्टोबर) रोजी झालेल्या बैठकीत मुख्यमंत्रीनीं आपण वेळोवेळी राज्यातील आर्थिक परिस्थितीचा आढावा घेत असतो तसेच पदाधिकाऱ्यांशी चर्चा करीत असतो अशी माहिती स्पष्ट केली. उत्तम वित्तीय व्यवस्थापनामुळे यंदाच्या वर्षी महसूल संकलनात वाढ झाली असल्याचं मुख्यमंत्री म्हणालेत.

राज्यातील वित्तीय अधिकाऱ्यांकडून वेळोवेळी केले गेलेले केंद्रीय योजनांचे ट्रॅकिंग किंवा प्रशासकीय सुधारणा, पायाभूत सुविधा, मानवी संसाधने आणि सामाजिक क्षेत्रातील विकास अशा विविध घटकांनी राज्यातील आर्थिक वाढीला हातभार लावला, शिवाय केंद्राकडून रिनीवेबल एनर्जी आणि इलेक्ट्रॉनिक्स उत्पादनातील गुंतवणुकीला प्रोत्साहन दिले गेल्याने राज्याला आर्थिक उंची गाठण्यास मदत मिळाली आहे.

देशाचे पंतप्रधान नरेंद्र मोदी यांना भारताला ५ ट्रिलियन डॉलरची अर्थव्यवस्था बनवायची आहे आणि यासाठी राज्याकडून वेळोवेळी प्रयत्न केले जातील असे देखील मुख्यमंत्री डॉ. प्रमोद सावंत म्हणालेत.

राज्यातील विकास प्रकल्पांना चालना देण्यासाठी राज्य सरकारने एप्रिल ते ऑक्टोबर २०२४ पर्यंत ७५० कोटी रुपयांचे कर्ज घेतले आणि आर्थिक वर्ष २०२४-२५ साठी कर्ज घेण्याची मर्यादा ३,७०० कोटी रुपये ठेवली आहे, मात्र काही अधिकाऱ्यांनी दिलेल्या माहितीनुसार कर्जाची ही मर्यादा ४,००० कोटींपेक्षा पुढे जाण्याची शक्यता आहे. मागच्या आर्थिक वर्षात म्हणजेच २०२३-२४ मध्ये राज्याने ४,२०० कोटी रुपयांपैकी अंदाजे ३,००० कोटी रुपयांचे कर्ज घेतले होते.