Netravali Wildlife Sanctuary

नेत्रावळी अभयारण्यात साळजिणी येथे शिकार करुन पार्टी करण्यासाठी गेल्याच्या संशयावरुन कदंबच्या 16 कर्मचाऱ्यांना वन खात्याच्या अधिकाऱ्यांनी ताब्यात घेतले.

सर्व कर्मचाऱ्यांना आज (सोमवार) न्यायालयात हजर केले असता त्यांना जामीन मंजूर करण्यात आला. विशेष म्हणजे जामिनानंतर सर्व कर्मचारी कामावर देखील रुजू झाल्याची माहिती कदंब महामंडळाचे अध्यक्ष उल्हास तुयेकर यांनी दिली आहे.

कदंबचे 'ते' 16 कर्मचारी पिकनीकसाठी नेत्रावळी अभयारण्यात गेले होते. त्यांनी अन्न शिवजविण्यासाठी सोबत साहित्य नेले होते, आग पेटवली म्हणून त्यांच्यावर कारवाई करण्यात आली अटक झालेली नाही. सर्व कर्मचारी मडगाव डेपोत रुजू झाले आहेत, अशी माहिती उल्हास तुयेकर यांनी दिली आहे.

कदंबचे कर्मचारी शिकारीसाठी नेत्रावळीत जात असल्याचा संशय वन खात्याच्या अधिकाऱ्यांना आला. अधिकाऱ्यांनी त्यांचा पाठलाग करुन सोळा जणांना ताब्यात घेतले.

कर्मचाऱ्यांकडे पाच काडतुसांसह कोयता, कुऱ्हाड आणि जेवण बनविण्यासाठी लागणारे साहित्य आढळून आले होते.

दरम्यान, सोमवारी त्यांनी न्यायालयात हजर केले असता त्यांना जामीन देण्यात आला असून, नेत्रावळी अभयारण्यात प्रवेश करण्यास बंदी घातली आहे.

वनमंत्री विश्वजीत राणे यांनी देखील या प्रकरणाची दखल घेत, सर्व कर्मचाऱ्यांवर कडक कारवाईचे आदेश दिले आहेत. त्याबाबत मुख्य वनसंरक्षकांना नोटीस बजावल्याचे राणे म्हणाले. संबधित प्रकरणात कोणाचीही गय केली जाणार नसल्याचे राणे म्हणाले.