राज्यात पावसानं थैमान घातलं आहे. सातत्याने पडणाऱ्या पावसामुळे पुरते जनजीवन विस्कळीत झाले आहे. पावसाळ्यात मासेमारीसाठी बंदी असते. मासेमारी हंगामाला 1 ऑगस्टपासून सुरुवात होत आहे. मासेमारी करणारे ट्रॉलर्स आणि बोटी देखील समुद्रात जाण्यास सज्ज आहेत. दरम्यान कोलवा समुद्रकिनाऱ्यावरुन मासेमारीसाठी जाणारी बोट समुद्रात उलटल्याच्या बातमीने खळबळ उडाली.

दरम्यान, हवामान आणि सुमद्राचा अंदाज न घेताच समुद्रात मासेमारीसाठी गेलेली बोट किनाऱ्यापासून काही अंतरावर उलटली. बोटीमधील मच्छिमार बांधवांनी आरडाआरोड करताच, किनाऱ्यारील जीवरक्षक पर्यटक पोलिसांनी तात्काळ खवळलेल्या समुद्रात बुडणाऱ्या 13 मच्छिमारांसह बोटही किनारी आणली. ही घटना आज सकाळी सव्वादहा वाजण्याच्या सुमारास घडली. कोलवा किनाऱ्यावरील जीवरक्षक आणि पर्यटक पोलिसांनी त्यांचा आवाज ऐकताच त्यांच्या दिशेने आगेकूच करत त्यांना रेस्क्यू केले.

मिळालेल्या माहितीनुसार, बोटीत मच्छिमार आणि मदतनीस मिळून 13 जण होते. हे सर्वजण मासेमारी करण्यासाठी समुद्रामध्ये गेले होते. मात्र आता त्यांना सुरक्षितरित्या रेस्क्यू करण्यात आले आहे. बचावकार्यादरम्यान, एक जीवरक्षक साहिल तुळसकर यांना दुखापत झाली. तुळसकर यांना तात्काळ उपचारासाठी दक्षिण गोवा जिल्हा रुग्णालयात हालवण्यात आले. तर दुसरीकडे, या 13 जणांपैकी एकाला किरकोळ दुखापत वगळता कोणत्याही मच्छिमार बांधवाला दुखापत झालेली नाहीये.