वास्को: सशस्त्र दरोड्याची भयंकर घटना मंगळवारी पहाटे बायणा येथे घडली. तोंडावर मुखवटे घातलेल्या ७-८ जणांच्या दरोडेखोरांच्या टोळीने चामुंडा आर्केडमधील व्यापारी सागर नायक यांच्या सहाव्या मजल्यावरील फ्लॅटमध्ये घुसून सव्वाकोटींचा मौल्यवान ऐवज आणि रोकड लुटली.

अधिक माहिती अशी की, लोखंडी आणि अ‍ॅल्युमिनियमचे रॉड घेऊन ७ ते ८ दरोडेखोर पहाटे २.३० वाजता इमारतीच्या मागील बाजूने नायक यांच्या फ्लॅटमध्ये घुसले. दरोडेखोरांनी बेडरूमचा दरवाजा रॉडने उघडला आणि सागर, त्यांची पत्नी हर्षा, मुलगी आणि हर्षा यांची वृद्ध, आजारी आई यांच्यावर निर्दयीपणे हल्ला केला.

सुरुवातीला सागर यांनी प्रतिकार केला आणि चाव्या देण्यास नकार दिला, तेव्हा हल्लेखोरांनी त्यांना क्रूरपणे मारहाण केली. त्यामुळे ते गंभीर जखमी झाले. या टोळीने घराची झडती घेतली आणि कुटुंबातील सदस्यांना बांधून ठेवले. तसेच त्यांना जीवे मारण्याची धमकीही दिली.

दिवाळी सणानंतर आणि पर्तगाळ मठातील आगामी कार्यक्रमापूर्वी नायक कुटुंबीयांनी घरात मोठ्या प्रमाणात सोन्याचे दागिने आणि रोख रक्कम ठेवली होती. त्याच अनुषंगाने दरोडेखोरांनी हे निवासस्थान लक्ष्य बनविले.

पहाटे ३.०५ वाजण्याच्या सुमारास दरोडेखोर मौल्यवान ऐवज आणि रोकड घेऊन पळून गेले. सागर नायक हे या हल्ल्यात गंभीर जखमी झाले असून, त्यांच्यावर रुग्णालयात उपचार सुरू आहेत. त्यांची प्रकृती स्थिर असल्याचे सांगण्यात आले. या हल्ल्यात सागर यांनी पत्नी आणि मुलगी देखील जखमी झाली आहे.

दरोडेखोर कॅमेऱ्यात कैद

या घटनेची माहिती मिळताच दक्षिण गोव्याचे एसपी, डीवायएसपी आणि विविध पोलिस पथके घटनास्थळी दाखल झाली. दक्षिण गोव्याचे पोलिस अधीक्षक टिकम सिंग वर्मा यांनी घटनास्थळाला भेट दिली आणि या घटनेची पुष्टी केली.

ते म्हणाले की, गुन्हेगारांना ओळखण्यासाठी आणि पकडण्यासाठी पोलिस सीसीटीव्ही फुटेज आणि इतर संकेतांचे विश्लेषण करत आहेत.

आधीच रेकी केल्याची शक्यता

सागर यांची पत्नी हर्षा यांनी पोलिसांना दिलेल्या जबानीत म्हटले, की हल्लेखोर तरुण दिसत होते आणि ते बिहारसारख्या भाषेत बोलत होते. त्यांनी असेही नमूद केले, की या दरोडेखोरांना इमारतीचा आराखडा माहीत होता.

ते जाणीवपूर्वक सीसीटीव्ही कॅमेरे टाळत होते. यावरून असे दिसून येते, की त्यांना या परिसराबद्दल आधीच माहिती होती. सर्व दरोडेखोरांचे चेहरे मास्क आणि हेल्मेटने झाकलेले होते