Abondoned Baby Found in Goa : वास्को येथे सापडलेल्या बेवारस अर्भकाच्या धक्कादायक घटनेनंतर गोवा राज्य बाल हक्क संरक्षण आयोगाने (जीएससीपीसीआर) त्याची गंभीर दखल घेतली आहे. राज्यात गेल्या पाच वर्षांत सुमारे 11 मृत अर्भकांची प्रकरणे नोंद झाली आहेत. त्यासंदर्भात संबंधित खात्याने केलेल्या कारवाईचा अहवाल चार आठवड्यात सादर करण्याचा आदेश आयोगाने महिला व बाल विकास, आरोग्य व पोलिस खात्याला दिला आहे.

अलिकडच्या काळात बेवारस अर्भक सापडण्याच्या अनेक घटना घडल्या आहेत. अशा प्रकरणांवर नियंत्रण ठेवण्यासाठी व अर्भकांच्या संरक्षणासाठी संबंधित खात्याच्या अधिकाऱ्यांनी अधिक तयारी व कृती करण्याची गरज आहे, असे मत आयोगाचे अध्यक्ष पीटर एफ बोर्जेस यांनी व्यक्त केले आहे.

2017 ते 2022 या काळात 11 अर्भके सापडली आहेत. त्यापैकी 7 मुली आहेत. त्यातील 4 अर्भके यावर्षी सापडली आहेत. या प्रकरणातील दोन प्रकरणांमध्ये लिंग निर्दिष्ट केलेले नाही. या प्रकरणांवर चिंता व्यक्त करत आयोगाने सरकारी संस्थांनी अशा अर्भक संरक्षणासाठी पुढे येण्याची गरज व्यक्त केली आहे.

मुलाच्या हव्यासापोटी कृत्य

काही अर्भके जिवंत किंवा मृतावस्थेत निर्जनस्थळी किंवा कचरापेट्यांत टाकण्यात आल्याच्या घटना समोर आल्या आहेत. काही पालक मुलगी जन्मल्याने व मुलग्याच्या हव्यासापोटी असे कृत्य करत आहेत. त्यामुळे लिंगभेदाबाबत समाजात असलेली चुकीची भावना दूर करण्यासाठी सामाजिक संस्थांनी त्याची जनजागृती करण्याची गरज आहे.

कडक कारवाईची गरज

सरकारनेही यासंदर्भात ठोस पावले उचलण्याची गरज आहे. जे पालक अशी कृत्ये करतात त्यांच्याविरुद्ध पोलिसांनी कडक कारवाई करण्याची आवश्‍यकता आहे. अर्भक टाकून देण्याच्या प्रकाराबाबत आयोगाने चिंता व्यक्त करत हे प्रकार थांबण्यासाठी पावले उचलण्याच्या सूचना केल्या आहेत.