New Zuari Bridge: द आर्किटेक्चरल मार्व्हल म्हटल्या जात असलेल्या गोव्यातील नवीन झुआरी पुलाच्या दुसऱ्या लेनचे उद्घाटन कधी याची उत्सुकता आता गोमंतकीयांना लागली आहे.

मुख्यमंत्री डॉ. प्रमोद सावंत यांनी शनिवारी ट्विट करत या पुलाच्या दुसऱ्या लेनचे कामही शंभर टक्के पूर्ण झाल्याचे म्हटले आहे. मुख्यमंत्र्यांनी त्यांच्या ट्विटर अकाऊंटवरून त्याचे फोटोही शेअर केले आहते.

मुख्यमंत्र्यांनी म्हटले आहे की, गोव्याचे द आर्किटेक्चरल मार्व्हल असलेला हा पूल आता जवळपास संपूर्ण तयार झाला आहे. दुसऱ्या टप्प्यातील शंभर टक्के लोडिंगचे काम पूर्ण झाले आहे.

पूर्ण क्षमतेने हा पूल वाहतुकीसाठी सुरू झाल्यानंतर प्रवासाच्या वेळेत बचत होणार आहे. त्याचा फायदा वाहनधारकांना होणार आहे. गोव्यातील पायाभूत सुविधांना बळकटी देण्यासाठी, या सुविधांना आणखी वाढविण्यासाठी हा पूल महत्वाचा ठरेल.

तसेच आर्थिक संधी प्राप्त होऊन गोव्याच्या विकासासाठीही हा पूल महत्वाचा ठरणार आहे.

दरम्यान, नवीन झुवारी पुलाच्या दुसऱ्या लेनचे एकूण काम 10 डिसेंबरपर्यंत पूर्ण होणे अपेक्षित आहे, असे ‘दिलीप बिल्डकॉन’चे उपाध्यक्ष अतुल जोशी यांनी सांगितले होते. ही लेन खुली झाल्यानंतर वाहतूक सुरळीत होण्यास मदत होणार आहे.

गुरुवारपासून या दुसऱ्या लेनची ‘रोड टेस्ट’ केली जाणार आहे. पुढे रेलिंग टाकण्याचे छोटे काम बाकी असून ते या आठवडाभरात पूर्ण होईल, असेही ते म्हटले होते तसेच या लेनचे उद्‍घाटन कधी करायचे हा निर्णय राज्य सरकार घेणार असल्याचेही त्यांनी सांगितले होते.