फोंडा: माशेल येथे काल रात्री एका युवकाकडून गांजा हस्‍तगत करण्‍यास फोंडा पोलिसांना यश मिळाले. संशयित सूरज रामप्रताप साह हा मूळ बिहार येथील असून तो सध्या कुंभारजुवे-माशेल येथे राहतो. तो माशेल येथे अंमलीपदार्थ विकण्यासाठी येणार असल्याची माहिती पोलिसांना मिळाल्यानंतर त्यांनी सापळा रचून त्याला ताब्यात घेतले.

संशयिताची झडती घेतली असता त्याच्याकडे 1300 ग्रॅम वजनाचा गांजा सापडला. त्‍याची किंमत 1 लाख 30 हजार रुपये असल्याची माहिती पोलिसांनी दिली. संशयिताला अटक करून पोलिस कोठडीत ठेवण्यात आले आहे. या कारवाईत फोंडा पोलिस स्थानकाचे उपनिरीक्षक साजित पिल्ले, हेड-कॉन्स्टेबल वंदेश सतरकर, कॉन्स्टेबल अमेय गोसावी, मयूर देसाई व आदित्य नाईक यांनी भाग घेतला. पोलिस निरीक्षक विजयकुमार चोडणकर यांच्या मार्गदर्शनाखाली ही कारवाई करण्यात आली.