पणजी: वर्ल्ड लीजंड्स प्रो टी-२० लीग क्रिकेट स्पर्धेच्या आयोजनात आम्हाला गोव्यात भरपूर सहकार्य लाभले, त्यामुळे स्पर्धा येत्या दशकभरात गोव्यातच घेण्यात आम्हाला आनंद वाटेल, असे महेश भूपती यांनी रविवारी सांगितले. ते वर्ल्ड लीजंड्स स्पर्धेचे आयोजक ‘एसजीएई’चे मुख्य कार्यकारी अधिकारी (सीईओ) आहेत.

महान टेनिसपटू, जागतिक टेनिस दुहेरीतील माजी अग्रमानांकित महेश भूपती यांच्या मताशी गोव्याचे पर्यटनमंत्री रोहन खंवटे यांनीही सहमती दर्शविली. क्रीडा पर्यटनाने गोव्यासाठी महत्त्व अधोरेखित करताना खंवटे यांनी वर्ल्ड लीजंड्स प्रो टी-२० लीगसाठी गोवा हे कायमस्वरुपी केंद्र करण्यासाठी प्राधान्यक्रम राहील असे नमूद केले.

सहा फ्रँचाईजी संघांच्या स्पर्धेची अधिकृत घोषणा रविवारी दोना पावला पत्रकार परिषदेत झाली. स्पर्धेला सोमवारपासून (ता. २६) वेर्णा येथील नव्याने बांधण्यात आलेल्या १९१९ स्पोर्टस स्टेडियमवर सुरवात होईल.

पत्रकार परिषदेत भारताचे माजी कसोटीपटू हरभजन सिंग, शिखर धवन, पियुष चावला, नमन ओझा, ऑस्ट्रेलियाचा माजी कसोटीपटू शेन वॉटसन, वेस्ट इंडीजचा कार्लोस ब्राथवेट यांची उपस्थिती होती. स्पर्धा २६ जानेवारी ते ४ फेब्रुवारी या कालावधीत खेळली जाईल.