पणजी: गोव्याच्या आरंभीच्या फलंदाजांचा सूर हरपला, परिणामी विदर्भाने सय्यद मुश्ताक अली करंडक टी-२० क्रिकेट स्पर्धेत सात विकेट्स आणि १५ चेंडू राखून सोपा विजय संपादला. एलिट ड गट सामना शनिवारी कोलकता येथील जादवपूर विद्यापीठ मैदानावर झाला.

विदर्भाने नाणेफेक जिंकून गोव्याला प्रथम फलंदाजीस पाचारण केले. सुरवातीचे चार फलंदाज विशेष प्रतिकार करू शकले नाहीत, त्यामुळे आठव्या षटकात गोव्याचा डाव ४ बाद ४६ असा घसरला. त्यानंतर गोव्याला आवश्यक धावगती राखणे कठीण गेले. गोव्याला निर्धारित २० षटकांत ९ बाद १४६ धावाच करता आल्या.

दीपराज गावकरने सर्वाधिक ३९ धावा करताना ३७ चेंडूंतील खेळीत दोन चौकार व एक षटकार मारला. सलामीचा फलंदाज कर्णधार अथर्व तायडे (५२) व रविकुमार समर्थ (५३) यांची अर्धशतके आणि त्यांनी दुसऱ्या विकेटसाठी ७७ चेंडूंत केलेल्या १०४ धावांच्या भागीदारीमुळे विदर्भाने सामना आरामात जिंकला. त्यांनी १७.३ षटकांत ३ बाद १५० धावा केल्या. गोव्याचा स्पर्धेतील पुढील सामना १६ नोव्हेंबर रोजी उत्तराखंडविरुद्ध होईल.

संक्षिप्त धावफलक

गोवा: २० षटकांत ९ बाद १४६ (शिवेंद्र भुजबळ ६, ईशान गडेकर १७, अभिनव तेजराणा २, सुयश प्रभुदेसाई ४, दीपराज गावकर ३९, ललित यादव १८, दर्शन मिसाळ १५, विकास सिंग १७, फेलिक्स आलेमाव २, वासुकी कौशिक नाबाद १०, शुभम तारी नाबाद ९, सौरभ दुबे ४-०-३०-४) पराभूत वि. विदर्भ: १७.३ षटकांत ३ बाद १५० (अथर्व तायडे ५२, रविकुमार समर्थ ५३, वेदांत जाजू नाबाद २३, वासुकी कौशिक ४-०-२९-०, फेलिक्स आलेमाव २.३-०-१७-१, शुभम तारी ४-०-३८-२, दीपराज गावकर ३-०-२०-०, विकास सिंग १-०-११-०, ललित यादव २-०-१९-०, दर्शन मिसाळ १-०-११-०).