पणजी: कर्णधार सुयश प्रभुदेसाई व कश्यप बखले पुन्हा एकदा गोव्यासाठी ‘मॅचविनिंग’ जोडी ठरली. त्यांच्या शानदार अर्धशतकांच्या बळावर जम्मू-काश्मीरला सात विकेट राखून नमवत सय्यद मुश्ताक अली करडक टी-२ क्रिकेट स्पर्धेत सलग तिसरा, तर एकंदरीत चौथा विजय नोंदविला.

स्पर्धेच्या एलिट ब गटातील सामना शनिवारी कोलकाता येथील ईडन गार्डन्सवर झाला. गोव्यासमोर विजयासाठी १६२ धावांचे आव्हान होते, त्यांनी १९ षटकांतच ३ बाद १६७ धावा करून लक्ष्य साध्य केले. सलग तिसरे, तर कारकिर्दीतील एकंदरीत दहावे अर्धशतक केलेल्या सुयशने ३८ चेंडूंत नाबाद ५१ धावा करताना दोन चौकार व तेवढेच षटकार मारले.

तो सलग तिसऱ्यांदा सामन्याचा मानकरी ठरला. सलामीच्या कश्यप बखले याने सलग दुसरे अर्धशतक नोंदविले. त्याने ४४ चेंडूंत आठ चौकार व एका षटकारासह ५९ धावा केल्या. दीपराज गावकर (०) लगेच बाद झाल्यानंतर कश्यप व अभिनव तेजराणा (१७) यांनी दुसऱ्या विकेटसाठी ५३ धावांची भागीदारी केली, मात्र अभिनव धावबाद झाला. नंतर कश्यप व सुयश यांनी तिसऱ्या विकेटसाठी ८२ धावांची भागीदारी करून संघाच्या विजयाचा पाया रचला.

२६ धावांची आवश्यकता असताना कश्यप बाद झाल्यानंतर ललित यादवने १३ चेंडूंत तीन चौकार व एका षटकारासह आक्रमक २४ धावा करून सुयशच्या साथीत गोव्याच्या विजयावर शिक्कामोर्तब केले. गोव्याचा अखेरचा सामना ८ डिसेंबर रोजी महाराष्ट्राविरुद्ध होईल.

त्यापूर्वी, गोव्याने नाणेफेक जिंकल्यानंतर जम्मू-काश्मीरला प्रथम फलंदाजीस पाचारण केले. त्यांना ७ बाद १६१ धावांची मजल मारता आली. जायबंदी अर्जुन तेंडुलकरच्या जागी संघात आलेल्या वेगवान शुभम तारी याने गोव्यातर्फे शानदार मारा करताना ३० धावांत तीन गडी बाद केले. जम्मू-काश्मीरतर्फे यावर हसन याने ४८, तर कर्णधार शुभम खजुरिया याने ४५ धावा केल्या.

संक्षिप्त धावफलक : जम्मू-काश्मीर ः २० षटकांत ७ बाद १६१ (शुभम खजुरिया ४५, यावर हसन ४८, कवलप्रीत सिंग ३०, अब्दुल समद २२, वासुकी कौशिक ३-०-१८-०, शुभम तारी ४-०-३०-३, हेरंब परब ३-०-३१-०, दीपराज गावकर २-०-२३-१, दर्शन मिसाळ ४-०-२७-०, विकास सिंग ४-०-३२-१) पराभूत वि. गोवा ः १९ षटकांत ३ बाद १६७ (कश्यप बखले ५९, दीपराज गावकर ०, अभिनव तेजराणा १७, सुयश प्रभुदेसाई नाबाद ५१, ललित यादव नाबाद २४).