करंजाळ - मडकई येथील सरकारी प्राथमिक विद्यालयाची इयत्ता चौथीची विद्यार्थिनी श्रव्या समीर फडते हिने अखिल गोवा पातळीवरील जलतरण स्पर्धेत मुलींच्या गट ४ मध्ये चॅम्पियनशिप प्राप्त केली. तिने एकूण आठ पदके पटकावल्याबद्दल तिचे या परिसरात कौतुक होत आहे.

ही स्पर्धा गोवा जलतरण संघटनेतर्फे फोंडा येथील क्रीडा जलतरण संकुलात नुकतीच झाली. तिने १०० मिटर फ्रीस्टाइल, ५० मि. फ्रीस्टाईल, ४ x ५० मि. मेडले रिले, ४ x ५० मि. फ्रीस्टाइल रिलेमध्ये सुवर्णपदके तसेच ५० मि. ब्रेस्ट स्ट्रोक, ५० मि. बॅक स्ट्रोक, ५० मि. बटरफ्लाय व २०० मि. आय. एम. प्रकारात रजत पदके प्राप्त केली. तिच्या या यशाबद्दल शाळेच्या पालक - शिक्षक समितीतर्फे तसेच ग्रामस्थांकडून तिचे अभिनंदन करण्यात येत आहे.