पणजी: अर्जुन तेंडुलकर व मोहित रेडकर या सातव्या विकेटने झुंज दिलेली असली, तरी रणजी करंडक क्रिकेट स्पर्धेच्या एलिट ब गटातील लढतीत गोव्याचा फॉलोऑन टाळण्यासाठी अजूनही संघर्ष सुरू आहे. चार विकेट बाकी असताना त्यांना नामुष्की टाळण्यासाठी आणखी ५१ धावांची गरज असून यजमान कर्नाटक संघ अजूनही २०० धावांनी पुढे आहे.

शिमोगा येथील कर्नाटक राज्य क्रिकेट संघटनेच्या नवुले स्टेडियम सुरू असलेल्या सामन्याच्या तिसऱ्या दिवशी सोमवारी पावसाळी वातारणामुळे फक्त ६४ षटकांचाच खेळ होऊ शकला. कर्नाटकच्या पहिल्या डावातील ३७१ धावांना उत्तर देताना गोव्याने खेळ थांबला तेव्हा ६ बाद १७१ धावा केल्या होत्या.

अर्जुन ४३ धावांवर खेळत असून मोहितने २४ धावा केल्या आहेत. या दोघांनी सातव्या विकेटसाठी ५६ धावांची अभेद्य भागीदारी केली आहे. त्यापूर्वी, डाव ६ बाद ११५ असा संकटात असताना गोव्यासमोर फॉलोऑनची शक्यता जास्त होती. त्यानंतर अर्जुन व मोहित यांनी १४२ चेंडू किल्ला लढवत कर्नाटकच्या गोलंदाजांना सतावले.

रात्री पडलेल्या पावसामुळे सोमवारी सकाळच्या सत्रात तासाभराचा खेळ वाया गेला, तसेच दिवसअखेर अंधूक प्रकाशामुळे खेळाडूंना लवकर ड्रेसिंग रुममध्ये परतावे लागले. कालच्या १ बाद २८ वरुन गोव्याची कर्नाटकच्या धारदार माऱ्यासमोर ४ बाद ५१ अशी स्थिती झाली होती.

ललित यादव (३६) व दर्शन मिसाळ (१२) यांनी पाचव्या विकेटसाठी ४९ धावांची भागीदारी केल्यामुळे गोव्याला शतक गाठता आले, मात्र हे दोन्ही फलंदाज १५ धावांच्या अंतराने माघारी फिरल्यामुळे गोव्याची बाजू खूपच कमकुवत झाली.

संक्षिप्त धावफलक

कर्नाटक, पहिला डाव ः ३७१.

गोवा, पहिला डाव (१ बाद २८ वरुन) ः ७७ षटकांत ६ बाद १७१ (सुयश प्रभुदेसाई १२, अभिनव तेजराणा १८, स्नेहल कवठणकर १०, ललित यादव ३६, दर्शन मिसाळ १२, अर्जुन तेंडुलकर नाबाद ४३, मोहित रेडकर नाबाद २४, विद्वत कावेरप्पा २-३०, अभिलाष शेट्टी ३-६५, यशोवर्धन परणतप १-१८).