पणजी: इंडियन सुपर लीग (आयएसएल) फुटबॉल स्पर्धेच्या प्ले-ऑफ फेरीस २९ मार्चपासून सुरवात होईल. उपांत्य फेरीत परतीचा सामना घरच्या मैदानावर खेळण्याचा लाभ एफसी गोवास मिळेल. त्यांचा पहिला सामना अवे मैदानावर दोन एप्रिल रोजी, तर होम सामना फातोर्डा येथे सहा एप्रिल रोजी खेळला जाईल.

लीग शिल्ड विजेता मोहन बागान आणि साखळी फेरीतील द्वितीय स्थानावरील एफसी गोवा संघ थेट उपांत्य फेरीसाठी पात्र ठरले आहेत. आयएसएल स्पर्धेच्या प्ले-ऑफ फेरीतील बाद फेरी लढती २९ व ३० मार्च रोजी साखळी फेरीतील अनुक्रमे तिसऱ्या ते सहाव्या क्रमांकावरील संघांत खेळल्या जातील. २९ रोजी बंगळूर एफसी व मुंबई सिटी एफसी यांच्यात, तर ३० रोजी नॉर्थईस्ट युनायटेड व जमशेदपूर एफसी यांच्यात सामना होईल.

उपांत्य फेरी द्विसाखळी पद्धतीने खेळली जाईल. या फेरीतील सामने अनुक्रमे दोन, तीन, सहा व सात एप्रिल रोजी खेळले जातील. आयएसएल करंडक अंतिम सामना १२ एप्रिल रोजी खेळला जाईल. उपांत्य फेरीत एफसी गोवा संघासमोर बंगळूर एफसी व मुंबई सिटी यांच्यातील विजेत्या संघाचे, तर मोहन बागानसमोर नॉर्थईस्ट युनायटेड व जमशेदपूर एफसी यांच्यातील विजेत्या संघाचे आव्हान असेल.

प्ले-ऑफ फेरीत प्रतिस्पर्धी संघांनी समान गोल नोंदविले, तर निकालासाठी अतिरिक्त वेळेचा अवलंब होईल. तेथेही बरोबरी झाल्यास पेनल्टी शूटआऊटवर निकाल लागेल.

आयएसएल स्पर्धेच्या साखळी फेरीत मोहन बागानने सलग दुसऱ्यांदा अव्वल क्रमांक मिळविताना शिल्डचा मान मिळविला. एफसी गोवा संघ द्वितीय स्थानी राहिला, तर बंगळूर एफसी (तिसरा क्रमांक), नॉर्थईस्ट युनायटेड (चौथा क्रमांक), जमशेदपूर एफसी (पाचवा क्रमांक) व मुंबई सिटी एफसी (सहावा क्रमांक) यांनी प्ले-ऑफ फेरीतील जागा पक्की केली.