Indian Super League 2024-25

पणजी: एफसी गोवा संघ सध्या चांगले फुटबॉल खेळत नसून सांघिक पातळीवर असमतोल असल्याची कबुली खुद्द मुख्य प्रशिक्षक मानोलो मार्केझ यांनी दिली आहे. या पार्श्वभूमीवर त्यांच्यावर सामना जिंकण्याचा दबाव असून इंडियन सुपर लीग (आयएसएल) फुटबॉल स्पर्धेत दोन्ही सामने गमावलेल्या ईस्ट बंगालविरुद्ध प्रतिष्ठा पणास लागेल.

कोलकता येथील विवेकानंद युवा भारती क्रीडांगणावर ईस्ट बंगाल व एफसी गोवा यांच्यातील सामना खेळला जाईल. कार्ल्स कुआद्रात यांच्या मार्गदर्शनाखालील ईस्ट बंगालला अनुक्रमे बंगळूर एफसी व केरळा ब्लास्टर्सविरुद्ध अवे मैदानावर पराभवाचा सामना करावा लागला, पण पराभूत होण्यापूर्वी त्यांनी प्रतिस्पर्ध्यांना चांगलेच झुंजविले होते. त्यामुळे एफसी गोवाची डोकेदुखी वाढली आहे.

एफसी गोवाचा दोन लढतीतून फक्त एक गुण असून मोहम्मेडन स्पोर्टिंगविरुद्ध खराब खेळल्यानंतर भरपाई वेळेतील गोलमुळे एफसी गोवा संघाला गुणखाते उघडता आले. घरच्या मैदानावर ईस्ट बंगाल संघ विजयाच्या पूर्ण तीन गुणांसाठी नेटाने खेळणार हे स्पष्ट आहे.

सलग चार सामने विजयाविना

आयएसएल स्पर्धेत गतमोसमाच्या अखेरीस दोन व यंदा सुरवातीस दोन मिळून सलग चार सामने एफसी गोवा विजयाविना आहे. आपणास आकडेवारीत स्वारस्य नसल्याचे मार्केझ यांचे म्हणणे असले, तरी ते फक्त एका गुणाच्या कमाईमुळे सध्या निश्चितच चिंतित आहेत.

मैदानात उतरण्यापूर्वी...

यंदा आयएसएल स्पर्धेत एक बरोबरी व एका पराभवामुळे एफसी गोवाचा फक्त एक गुण

ईस्ट बंगालचा दोन्ही अवे लढतीत पराभव, घरच्या मैदानावर शुक्रवारी पहिलाच सामना

गतमोसमात एफसी गोवा भुवनेश्वर येथे २-१, तर फातोर्डा येथे १-० फरकाने ईस्ट बंगालविरुद्ध विजयी

ईस्ट बंगालविरुद्ध आयएसएलमध्ये एफसी गोवाचे सलग चार विजय

एकंदरीत आठ आयएसएल लढतीत एफसी गोवाचे पाच, ईस्ट बंगालचा एक विजय, दोन बरोबरी