ISL 2024-25 FC Goa VS Mohan Bagan Football Match

पणजी: मोहन बागानने इंडियन सुपर लीग (आयएसएल) फुटबॉल स्पर्धेत सध्या फक्त एकच सामना गमावला असून कोलकत्यातील बलाढ्य संघ सध्या अव्वल स्थानी आहे. त्यांना पराभूत करण्याची किमया एफसी गोवाने शुक्रवारी (ता. २०) साधल्यास ते गुणतक्त्यात तिसऱ्या क्रमांकापर्यंत प्रगती साधतील. सामना फातोर्डा येथील पंडित जवाहरलाल नेहरू स्टेडियमवर खेळला जाईल.

सध्या मोहन बागानचे २६, बंगळूर एफसीचे २४, तर ओडिशा व एफसी गोवाचे प्रत्येकी १९ गुण आहेत. मोनोलो मार्केझ यांच्या मार्गदर्शनाखालील एफसी गोवा संघ मागील सहा सामने अपराजित असून यामध्ये चार विजय व दोन बरोबरींचा समावेश आहे.

मोहन बागानने ११ पैकी सहा सामन्यांत क्लीन शीट राखली आहे, त्यामुळे त्यांच्याविरुद्ध गोल नोंदविणे एफसी गोवासाठी सोपे नसेल. मोहन बागानने ११ पैकी आठ सामने जिंकले असून तेवढेच सामने खेळलेल्या एफसी गोवाने पाच विजय नोंदविले आहेत.

दोन्ही संघांनी आक्रमणात चमक दाखविली आहे. मोहन बागानने २२, तर एफसी गोवाने २१ गोल नोंदविले आहेत. मागील १० आयएसएल सामन्यांत मोहन बागानने सहा, तर एफसी गोवाने तीन सामने जिंकले आहेत. त्यामुळे कोलकत्यातील संघ गोव्यात वर्चस्व राखण्याची शक्यता आहे.