पणजी: गोव्याचा दिव्यांग टेबल टेनिसपटू चेतन साळगावकर याने सलग दुसऱ्यांदा खेलो इंडिया पॅरा गेम्समध्ये टेबल टेनिसमध्ये पदक जिंकण्याची किमया साधली. पुरुष एकेरीतील एस-९ प्रकारात तो ब्राँझपदकाचा मानकरी ठरला.

नवी दिल्ली येथे दुसऱ्या खेलो इंडिया पॅरा गेम्स सुरू आहे. कोलवाळ येथील चेतन याने २०२३ साली झालेल्या पहिल्या खेलो इंडिया पॅरा गेम्समध्येही टेबल टेनिसमध्ये ब्राँझपदक जिंकले होते. चेतन याने दोन वर्षांपूर्वी राष्ट्रीय पॅरा टेबल टेनिस स्पर्धेतही ब्राँझपदकाची कमाई केली होती.

खेलो इंडिया पॅरा गेम्समध्ये गोव्याला यंदा एकूण दोन पदके (प्रत्येकी एक सुवर्ण व ब्राँझ) मिळाली. ॲथलेटिक्समध्ये साक्षी काळे हिने महिलांच्या टी-१३ प्रकारात १०० मीटर शर्यतीत१४.४७ सेकंद वेळेसह सुवर्णपदक पटकावले होते.

दुसऱ्या खेलो इंडिया पॅरा गेम्समध्ये गोव्याने ॲथलेटिक्स व टेबल टेनिसमध्ये भाग घेतला होता, दोन्ही खेळांत गोव्याला पदके मिळाली. क्रीडा व युवा व्यवहार संचालनालयाचे उपसंचालक विवेक पवार यांनी नवी दिल्लीतील स्पर्धेत गोव्याचे चेफ द मिशन या नात्याने जबाबदारी सांभाळली. त्यांनी पदक विजेत्या खेळाडूंचे अभिनंदन केले आहे.