पणजी: कुचबिहार करंडक १९ वर्षांखालील क्रिकेट सामन्यात गोव्याला पुन्हा एकदा फलंदाजांनी दगा दिला, मात्र हरियानाविरुद्धच्या चार दिवसीय लढतीच्या पहिल्या दिवशी गोलंदाजांनी चमक दाखविल्यामुळे आव्हान कायम राखता आले.

हरियानातील लाहली येथील चौधरी बन्सीलाल क्रिकेट स्टेडियमवर ‘क’ गट सामन्याला बुधवारपासून सुरवात झाली. तमिळनाडूविरुद्ध मागील लढतीत दुसऱ्या डावात ८४ धावांत गारद झालेल्या गोव्याच्या (Goa) फलंदाजांनी हरियानाविरुद्धही पहिल्या डावात साफ निराशा केली.

प्रथम फलंदाजीचे आमंत्रण मिळाल्यानंतर त्यांचा डाव ८८ धावांत संपुष्टात आला. नंतर हरियानाच्या (Haryana) पहिल्या डावात नील नेत्रावळकर याने तीन धक्के दिल्यामुळे यजमान संघाची दिवसअखेर ५ बाद १३३ अशी स्थिती असून त्यांच्यापाशी ४५ धावांची आघाडी जमा झाली आहे.

संक्षिप्त धावफलक

गोवा, पहिला डाव: ४३.२ षटकांत सर्वबाद ८८ (आदित्य कोटा १३, चिगुरुपती व्यंकट ०, दिशांक मिस्कीन २७, यश कसवणकर ०, निसर्ग नागवेकर २०, जीवनकुमार चित्तेम ०, पुंडलिक नाईक ९, शमिक कामत १०, अनुज यादव १, समर्थ राणे नाबाद ०, नील नेत्रावळकर ०, विष्णू चौधरी ३-२२, कनिष्क चौहान ५-१५, सुम्मी कादियान २-२४).

हरियाना, पहिला डाव: ४७ षटकांत ५ बाद १३३ (अझल सिवाच ४२, लक्षय नगर १७, सुखलीन सिंग २७, मोक्ष मुदगिल ११, रुद्राक्ष नरवाल नाबाद २४, पुंडलिक नाईक ३-०-१४-०, यश कसवणकर १४-१-४३-१, समर्थ राणे १-०-६-०, अनुज यादव १५-५-३७-१, नील नेत्रावळकर १४-३-३१-३).