पणजी: सामन्याची मानकरी पूजा कलेल (५-१५) व निखिला नाईक (३-८) यांची प्रभावी गोलंदाजी, तसेच अथश्री शिवारकर हिचे धडाकेबाज अर्धशतक (नाबाद ६६) या लाजबाव कामगिरीच्या बळावर गोव्याने १९ वर्षांखालील महिला आंतरराज्य टी-२० क्रिकेट स्पर्धेत हिमाचल प्रदेशला १८ धावांनी नमविले.

सामना शुक्रवारी पुदुचेरी येथे झाला. नाणेफेक जिंकून गोव्याने प्रथम फलंदाजी स्वीकारली. त्यांनी ४ बाद १३० धावा केल्या. अथश्रीने ५३ चेंडूंतील खेळीत आठ चौकार व एक षटकार मारला. तिने उस्मा खान (२४) हिच्यासमवेत तिसऱ्या विकेटसाठी ७३ धावांची भागीदारी केली.

नंतर डावखुरी फिरकी गोलंदाज पूजा व ऑफस्पिनर निखिला यांनी हिमाचल प्रदेशचा डाव १८.५ षटकांत ११२ धावांत गुंडाळला. गोव्याचा हा स्पर्धेतील तीन सामन्यांतील दुसरा विजय ठरला.