पणजी: सय्यद मुश्ताक अली करंडक टी-२० क्रिकेट स्पर्धेतील गोव्याची मोहीम बुधवारपासून (ता. २६) सुरू होत आहे. रणजी करंडक क्रिकेट स्पर्धेत ‘रेड बॉल’ने खेळल्यानंतर आता ‘व्हाईट बॉल’ क्रिकेटमध्ये कसोटी लागेल. एलिट ब गटातील सर्व सामने कोलकाता येथे खेळले जातील.

गोव्याच्या (Goa) टी-२० संघाचे नेतृत्व सुयश प्रभुदेसाई करत असून संघातील अष्टपैलू खेळाडूंच्या कामगिरीकडे लक्ष असेल. रणजी करंडक स्पर्धेतील मागील दोन पराभवांच्या पार्श्वभूमीवर गोव्याला टी-२० स्पर्धेत कामगिरी सुधारण्यासाठी प्रयत्नशील राहावे लागेल. गटात मातब्बर प्रतिस्पर्धी असल्याने कामगिरी उंचवावीच लागेल.

गतमोसमात (२०२४-२५) टी-२० स्पर्धेत गोव्याची कामगिरी खास नव्हती. सहा सामन्यांत चार पराभव पत्करावे लागले होते, तर फक्त दोन विजय नोंदविले होते. स्पर्धेच्या एलिट ब गटात २६ रोजी उत्तर प्रदेशविरुद्ध (Uttar Pradesh) खेळल्यानंतर गोव्याचा संघ २८ नोव्हेंबर रोजी चंडीगडविरुद्ध, ३० नोव्हेंबर रोजी हैदराबादविरुद्ध, २ डिसेंबरला मध्य प्रदेशविरुद्ध, ४ डिसेंबरला बिहारविरुद्ध ६ डिसेंबरला जम्मू-काश्मीरविरुद्ध, तर ८ डिसेंबरला महाराष्ट्राविरुद्ध सामना होईल.

गोव्याचा टी-२० संघ असा ः सुयश प्रभुदेसाई (कर्णधार), अभिनव तेजराणा, ईशान गडेकर, दीपराज गावकर, दर्शन मिसाळ, मोहित रेडकर, शुभम तारी, कश्यप बखले, राजशेखर हरिकांत, स्नेहल कवठणकर, अमूल्य पांड्रेकर, वासुकी कौशिक, अर्जुन तेंडुलकर, ललित यादव, फेलिक्स आलेमाव, विकास सिंग, हेरंब परब.