Goa Professional Football League 2024 Cortalim Villagers Vs FC Goa

पणजी: प्रोफेशनल लीग फुटबॉल स्पर्धेतील चुरशीच्या लढतीत कुठ्ठाळी व्हिलेजर्सने एफसी गोवा संघावर ३-२ अशी निसटती मात केली. म्हापसा येथील धुळेर स्टेडियमवर बुधवारी झालेल्या या लढतीत एफसी गोवास ४९व्या मिनिटापासून दहा खेळाडूंसह खेळावे लागले.

विश्रांतीनंतर खेळ सुरू झाल्यानंतर चौथ्या मिनिटास चेंडू हाताळल्याबद्दल मल्लिकजान कालेगर याला दुसऱ्या यलोसह रेड कार्ड मिळाले आणि एफसी गोवाचा एक खेळाडू कमी झाला. यावेळी मिळालेल्या पेनल्टी फटक्यावर सिडनी लुकास याने ५०व्या मिनिटास कुठ्ठाळी व्हिलेजर्सला आघाडी मिळवून दिली.

नंतर अलिस्टर फर्नांडिसने ५२व्या मिनिटास संघाची आघाडी २-० अशी वाढविली. ६७व्या मिनिटास ज्योव्हियल डायसने एफसी गोवाची पिछाडी १-२ अशी कमी केली. ७०व्या मिनिटास बदली खेळाडू प्रथमेश गावकरच्या गोलमुळे कुठ्ठाळी व्हिलेजर्सचे वर्चस्व वाढले.

७९व्या मिनिटास लेम्मेत तांगवा याच्या पेनल्टी गोलमुळे पुन्हा एकदा एफसी गोवाने पिछाडी कमी केली, पण नंतर ते बरोबरी साधू शकले नाहीत.

कुठ्ठाळी व्हिलेजर्सचा हा सात सामन्यांतील दुसरा विजय असून त्यांचे आठ गुण झाले आहेत. एफसी गोवास पाचवा पराभव पत्करावा लागला. त्यामुळे आठ लढतीनंतर त्यांचे नऊ गुण कायम राहिले.