पणजी: गोवा चॅलेंजर्सने अल्टिमेट टेबल टेनिस (यूटीटी) लीग स्पर्धेत सलग दुसऱ्यांदा विजेतेपद पटकावून भारतीय फ्रँचायजी टेबल टेनिसमधील वर्चस्व सिद्ध केले. या यशाने गोवा टेबल टेनिस संघटनेने राज्यातील टेबल टेनिस खेळाला ऊर्जितावस्था लाभण्याचा आशावाद व्यक्त करताना विजेत्यांचे अभिनंदन केले आहे.

गोव्यातील क्रीडाप्रेमी आणि धेंपो उद्योगसमूहाचे अध्यक्ष श्रीनिवास धेंपे यूटीटी विजेत्या गोवा चॅलेंजर्सचे सहमालक आहे. या अनुषंगाने गोवा टेबल टेनिस संघटनेचे अध्यक्ष सुदिन वेरेकर यांनी नमूद केले, की ‘‘या विजयाने प्रेरित होऊन गोवा टेबल टेनिस संघटना राज्यात यूटीटीच्या धर्तीवर लीग स्पर्धा सुरू करण्यास उत्सुक आहे.

यासंदर्भात लवकरच योजना जाहीर करू. या खेळात मोठ्या प्रमाणात नवोदितांना सामील करुन प्रेरित करण्यासाठी आम्ही कॉर्पोरेट भागीदारांना निमंत्रित करत आहोत. चाहते आणि भागधारकांच्या सततच्या पाठिंब्याने गोव्यातील टेबल टेनिस नवीन उंची गाठेल या आम्हाला विश्वास वाटतो.’’

यावेळची यूटीटी स्पर्धा चेन्नई येथे झाली. अंतिम लढतीत गोवा चॅलेंजर्सने हरमीत देसाई व यांग्झी लियू याच्या दमदार खेळाच्या बळावर दबंग दिल्ली संघाला नमवून सलग दुसऱ्या वर्षी विजेतेपद पटकावले. स्पर्धेत हरमीत सर्वोत्तम भारतीय टेबल टेनिसपटू ठरला, तर मौल्यवान खेळाडूचा मान लियू याला मिळाला.