Indian Super League 2024-25 FC Goa

पणजी: सामन्याच्या भरपाई वेळेतील गोलमुळे एफसी गोवाने नॉर्थईस्ट युनायटेडविरुद्ध पराभव टाळून इंडियन सुपर लीग फुटबॉल स्पर्धेत बरोबरीचा एक गुण प्राप्त केला. सामन्यानंतर यजमान संघाचे प्रशिक्षक मानोलो मार्केझ यांनी आपल्या संघाच्या कमजोर बचावावर तीव्र नाराजी व्यक्त केली.

फातोर्डा येथील पंडित जवाहरलाल नेहरु स्टेडियमवर शुक्रवारी रात्री एफसी गोवाने नॉर्थईस्ट युनायटेडला ३-३ गोल बरोबरीत रोखून एक गुण प्राप्त केला. बोर्हा हेर्रेरा याने भरपाई वेळेत, तर आर्मांदो सादिकू याने केलेल्या दोन गोलमुळे यजमान संघाला पराभव टाळता आला. नॉर्थईस्ट युनायटेडसाठी नेस्टर अल्बियाच याने दोन, तर अलाएद्दीन अजारेई याने एक गोल केला.

सामन्यात पिछाडीवरून बरोबरी साधल्यामुळे एफसी गोवा संघ सलग तीन सामने अपराजित आहे, पण घरच्या मैदानावर त्यांना अजून विजय नोंदविता आलेला नाही. पहिल्या लढतीत त्यांना फातोर्ड्यात जमशेदपूर एफसीने हरविले होते. एफसी गोवाने चार लढतीतून पाच गुणांची कमाई केली आहे. त्यांचा पुढील सामना फातोर्डा येथेच मुंबई सिटीविरुद्ध १९ ऑक्टोबरला होईल.

नॉर्थईस्ट युनायटेडविरुद्धच्या सामन्यानंतर मार्केझ यांनी सांगितले की, ‘‘आम्ही बचावात खराब कामगिरी प्रदर्शित केली. आम्ही खूपच वाईट पद्धतीने बचाव करत आहोत. आम्ही अशाप्रकारे गोल स्वीकारू शकत नाही. तरीही परिस्थिती सुधारेल याची मला खात्री आहे. आमच्यापाशी असलेला दर्जा लक्षात घेता आम्ही प्रगती साधू. आमचे महत्त्वाचे खेळाडू तंदुरुस्तीच्या वाटेवर आहेत.’’