पणजी: एफसी गोवा संघ १७ ऑक्टोबरपासून एफसी चॅलेंज लीग फुटबॉल स्पर्धेत खेळेल. या स्पर्धेसाठी त्यांचा ‘क’ गटात समावेश करण्यात आला असून सामने कुवेतमध्ये खेळले जातील.

मलेशियातील क्वालालंपूर येथे गुरुवारी सोडतीद्वारे संघांची गटनिश्चिती करण्यात आली. एफसी गोवाच्या क गटात कुवेतमधील कादसिया स्पोर्टस क्लब, बांगलादेशमधील फोर्टिस एफसी व ताजिकिस्तानमधील एफसी रेगर-तादएझ हे संघ आहेत.

एफसी गोवाच्या गटातील कादसिया एससी आणि फोर्टिस एफसी यांनी अनुक्रमे २०२५-२६ कुवेत प्रीमियर लीग आणि बांगलादेश फुटबॉल लीगमध्ये तिसरे स्थान मिळविले आहे. तर एफसी रेगर-तादएझ हा २०२५ मधील ताजिकिस्तान कप विजेता संघ आहे. गटसाखळी सामने १७ ते २३ ऑक्टोबर या कालावधीत एकाच ठिकाणी, एकेरी साखळी पद्धतीने खेळविले जातील. ‘क’ गटातील सर्व सामने कुवेतमध्ये होणार असून, कादसिया एससी या सामन्यांचे यजमानपद भूषवेल.

तिसऱ्यांदा आशियाई क्लब स्पर्धेत

२०२५-२६ मोसमात एआयएफएफ सुपर कपचे विजेतेपद मिळवल्यामुळे एफसी गोवाने इतिहासात तिसऱ्यांदा आशियाई (एएफसी) क्लब स्पर्धेत स्थान मिळविले. गेल्या बुधवारी (ता. १२ ऑगस्ट) एएफसी चॅम्पियन्स लीग-२ स्पर्धेच्या प्राथमिक फेरीत एफसी गोवाला एफके अर्कदागकडून ०-३ असा पराभव पत्करावा लागला होता.

त्यामुळे एफसी गोवाची एएफसी चॅलेंज लीगच्या गटसाखळीत वर्णी लागली. ही आशियातील पुरुषांच्या क्लब फुटबॉलमधील तिसऱ्या क्रमांकाची स्पर्धा आहे. २०२५-२६ मध्ये प्ले-ऑफ सामना जिंकून एफसी गोवाने एएफसी चँपियन्स लीग २ स्पर्धेच्या गटसाखळीसाठी पात्रता मिळविली होती, तर २०१९-२० मध्ये आयएसएल शिल्ड पटकावल्यामुळे एफसी गोवा संघ २०२१ मध्ये एएफसी चँपियन्स लीग एलिट स्पर्धेच्या गटसाखळीत खेळणारा पहिला भारतीय क्लब ठरला होता.