32nd National Junior Tennis Ball Cricket Tournament

पणजी: हरियानातील सोनिपत येथे झालेल्या ३२व्या राष्ट्रीय ज्युनियर टेनिस बॉल क्रिकेट स्पर्धेत गोव्याच्या मुलांना उपविजेतेपद मिळाले. अंतिम लढतीत उत्तर प्रदेशने त्यांच्यावर मात केली. मुलींच्या संघाला तिसरा क्रमांक मिळाला.

गोव्याच्या मुलांनी उपांत्य लढतीत महाराष्ट्राला नमविले. अंतिम लढतीत उत्तर प्रदेशने प्रथम फलंदाजी करताना निर्धारित आठ षटकांत सात बाद ६८ धावा केल्या. तुषार नाईकने दोन, तर अक्षद नाईक व साहिल पारोडकर यांनी प्रत्येकी एक गडी बाद केला. उत्तरादाखल गोव्याचा डाव ७.१ षटकांत ६२ धावांत संपुष्टात आला. ग्रंधार महातो याने १६, साहिल पारोडकरने १२, तुषार नाईकने १०, तर अक्षद नाईकने ११ धावा केल्या.

गोव्याच्या मुलींना उपांत्य सामन्यात त्यांना जम्मू-काश्मीरकडून ११ धावांनी पराभव पत्करावा लागल्यामुळे तिसऱ्या स्थानी समाधान मानावे लागले. जम्मू-काश्मीरने प्रथम फलंदाजी करताना ५.४ षटकांत ४७ धावा केल्या. गोव्यातर्फे पूर्वा गावडे व प्रतीक्षा केरकर यांनी प्रत्येकी एक, तर संचिता शेटगावकर व तनिशा वेळीप यांनी प्रत्येकी दोन गडी बाद केले. निर्धारित सहा षटकात गोव्याला ७ बाद ३६ धावाच करता आल्या. तनिशा वेळीपने सर्वाधिक १० धावा केल्या.