कळंगुट (Goa Assembly Election 2022): ‘टुगेदर फॉर बार्देश’साठी मंत्री मायकल लोबो आणि मी आजही एकत्रितच आहे. परंतु लोबो यांनी यदाकदाचित भाजपपासून वेगळी चूल मांडली तर मात्र मी भाजपचा शिलेदार म्हणून साळगाव मतदारसंघातून लढणार आहे, असे विधान माजी आमदार जयेश साळगावकर यांनी पत्रकारांशी बोलताना केले.

मुख्यमंत्री डॉ. प्रमोद सावंत (CM Pramod Sawant) यांच्यापासून ते भाजपच्या वरिष्ठ नेत्यांपर्यंत आपल्याला साळगाव मतदारसंघातून विधानसभेची उमेदवारी देण्यासाठी प्रयत्न चाललेले आहेत. त्यामुळे येत्या विधानसभा निवडणुकीत (Goa Assembly Election) आपला विजय निश्चित असल्याचे साळगावकर यांनी सांगितले. साळगांवकर यांचा भाजप प्रवेश झाल्यापासून स्थानिक भाजप मंडळात निर्माण झालेली बंडाळी अद्याप शमण्याची चिन्हे दिसत नाहीत. रेईश-मागूशचे सरपंच केदार नाईक यांच्यानंतर आता जिल्हा पंचायत सदस्य तथा भाजप मंडळाचे माजी अध्यक्ष रुपेश नाईक यांनीही अपक्ष म्हणून येत्या विधानसभा निवडणुकीत साळगावातून लढण्याचा निर्धार व्यक्त केला आहे.

दरम्यान, टुगेदर फॉर बार्देशचा एल्गार करणारे कळंगुटचे आमदार (MLA) मायकल लोबो यांनी हल्लीच केलेल्या एका वक्तव्यामुळे बार्देशातील अनेकांच्या नजरा त्यांच्या निर्णायक भूमिकेकडे लागलेल्या आहेत. तथापि, या भागातील राजकीय जाणकारांच्या मते, येत्या एक-दोन दिवसांत बार्देशातील राजकारणात मोठा भूकंप होण्याची शक्यता वर्तवली जात आहे.