पणजी: गोवा विधानसभा निवडणुकीच्या पार्श्वभूमीवर भाजप नेते आणि केंद्रीय महामार्गमंत्री नितीन गडकरी आज रविवारी दुपारी 12 वाजता पक्षाचा जाहीरनामा सादर करणार आहेत.
पणजीतील एका हॉटेलमध्ये जाहीरनामा प्रकाशन सोहळा आयोजित करण्यात आला आहे.
मुख्यमंत्री डॉ प्रमोद सावंत (Pramod Sawant), भाजपचे राज्य निवडणूक प्रभारी देवेंद्र फडणवीस, प्रदेशाध्यक्ष सदानंद शेट तानावडे आदी यावेळी उपस्थित राहतील. (Goa BJP Election 2022)

भाजपने (BJP) गोव्यातील लोकांकडून जाहिरनाम्यासाठी सल्ले मागितले होते. लोकांच्या शिफारशी व सूचनांचा जाहीरनाम्यात समावेश केला असल्याचा दावा भाजप करत आहे.

केंद्रीय मंत्री नितीन गडकरी (Nitin Gadkari) भाजप उमेदवारांच्या प्रचारात सहभागी होणार आहेत. ते सांगे मतदारसंघातील भाजपचे उमेदवार सुभाष फळदेसाई यांच्या प्रचारासाठी दुपारी 4:30 वाजता सांगे येथे जाहीर सभेत सहभागी होतील. पुढे केपे मतदारसंघातील भाजपचे उमेदवार उपमुख्यमंत्री चंद्रकांत उर्फ बाबू कवळेकर यांच्या प्रचारासाठी गडकरी सायंकाळी 5:45 वाजता केपे येथे एका जाहीर सभेला संबोधित करतील. शिरोडा मतदारसंघातील उमेदवार सुभाष शिरोडकर यांच्या प्रचारासाठी सायंकाळी सव्वा सात वाजता गडकरी जाहीर सभा घेणार आहेत. आगामी काळात भाजपच्या प्रचारासाठी अनेक दिग्गज नेते गोव्यात दाखल होणार आहेत. कॉंग्रेसचे नेते सुद्धा गोव्यात जोरदार प्रचार करत आहेत.