महाराष्ट्रवादी गोमंतक पक्षाचे नेते सुदिन ढवळीकर हे निवडणुकीपूर्वी सातत्याने भाजप विरोधी बोलत होते. त्यांनी भाजपला पाठिंबा देण्याचे टाळायला हवे होते, असे म्हणत गोवा तृणमूल काँग्रेसचे प्रमुख किरण कांदोळकर यांनी ढवळीकरांवर टीका केली.

कांदोळकर म्हणाले, ढवळीकर निकालापूर्वी भाजपच्या विरोधात बोलत होते. त्यांचा पक्ष भाजपला (BJP) कधीही पाठिंबा देणार नाही आणि प्रमोद सावंत यांच्या नेतृत्वाखाली मागोप कधीही काम करणार नाही, असे त्यांनी अनेकदा स्पष्ट केले होते. ढवळीकरांची व्यक्तिरेखा सर्वांनाच ठाऊक आहे. निवडणुकीपूर्वी ते भाजपच्या विरोधात बोलतात आणि निकालानंतर सरकार स्थापन करण्यासाठी त्यांनाच पाठिंबा देतात. निकालापूर्वी सुदिन ज्या प्रकारे भाजपबद्दल बोलत होते, त्यांनी किमान गोव्यातील लोकांप्रती प्रामाणिकपणा दाखवायला हवा होता,” ते म्हणाले.

टीएमसीने एकही जागा जिंकली नसली तरी आम्ही गोव्याकडे (Goa) लक्ष केंद्रित करत आहोत. टीएमसीच्या भविष्यातील योजनांची आखणी करण्यासाठी 26 मार्च रोजी पणजी (Panaji) येथे विशेष बैठक होणार आहे, असे कांदोळकर यांनी स्पष्ट केले.