पणजी: राज्यात विधानसभेची निवडणूक (Assembly elections) फेब्रुवारी महिन्‍यात होणार आहे. त्‍या अनुषंगाने निवडणूक (elections) आयोगामार्फत केल्या जाणाऱ्या प्रयत्नांची माहिती आज राजकीय पक्षांना देण्‍यात आली. निवडणूक स्वच्छ आणि भयमुक्त वातावरणात व्हावी यासाठी राजकीय पक्षांकडून सहकार्याची अपेक्षा मुख्य निवडणूक अधिकारी कुणाल यांनी केली आहे. सध्‍या आयोगाच्या वतीने निवडणूक यादी बनविण्याचे काम सुरू आहे.

शिवाय नावनोंदणी, नावात बदल, नाव कमी करणे आदी प्रक्रियाही सुरू आहे. नवमतदारांनी आपली नावे नोंद करून मतदान प्रक्रियेत सहभागी व्हावे यासाठी निवडणूक आयोग प्रयत्नशील आहे. म्‍हणूनच विविध प्रकारे जनजागृती केली जात आहे. प्रत्यक्ष निवडणुका जाहीर झाल्यापासून निकाल जाहीर होईपर्यंत राजकीय पक्षांनी घ्यावयाची काळजी आणि आदर्श निवडणूक आचारसंहितेचे उल्लंघन होऊ नये यासाठीची खबरदारी याची माहिती आयोगाने राजकीय पक्षांना दिली.