पणजी: गोव्यात सरकार स्थापन करण्यासाठी कॉंग्रेस पार्टीला कुणाचीही मदत घ्यावी लागणार नाही. कॉंग्रेस-गोवा फॉरवर्ड युती एकहाती सत्ता मिळवेल याची मला खात्री आहे. भाजप 'जुमला पार्टी' आहे. त्यामुळे मी गोव्यातील लोकांना कॉंग्रेसलाच मत देण्याचे आवाहन करतो, असे महाराष्ट्राचे माजी मुख्यमंत्री आणि कॉंग्रेस नेते अशोक चव्हाण (Ashok Chavan) हे गोमन्तकला दिलेल्या मुलाखतीत म्हणाले.

2017 च्या विधानसभा निवडणुकीत लोकांचा जनादेश मिळून सुद्धा कॉंग्रेसला (Congress) सत्ता स्थापन करता आली नाही. यावेळेस कॉंग्रेस सत्तेत येईल का? या प्रशांचे उत्तर देताना चव्हाण म्हणाले, आम्ही सरकार स्थापन करू शकलो नाही, हे मी मान्य करतो. मात्र यावेळेस कॉंग्रेस सत्तेत येईल. आम्हाला जनादेश मिळून सुद्धा भाजपने सरकार स्थापन केले. हा गोव्यातील लोकांचा अपमान आहे. भाजपमुळे (BJP) गोव्याचा विकास खुंटला आहे. कॉंग्रेसला संधी मिळाल्यास आम्ही नक्कीच गोव्याचा विकास करू.

सध्या पाच राज्यात निवडणुकांची रणधुमाळी सुरू आहे. कॉंग्रेसला आगामी निवडणुकीत कितपत यश मिळेल, याचे उत्तर देताना चव्हाण म्हणाले, मी उर्वरीत राज्यात दौरा केलेला नाही म्हणून मी त्यावर भाष्य करणार नाही, मात्र गोव्यात कॉंग्रेसला लोकांचा चांगला प्रतिसाद मिळत आहे.

कॉंग्रेस नवीन चेहऱ्यांना संधी देत नाही, या भाजपच्या आरोपावर स्पष्टीकरण देताना चव्हाण म्हणाले, यावेळेस आम्ही अनेक नवीन चेहऱ्यांना संधी दिली आहे. पण आम्ही जुन्या नेत्यांना दुर्लक्षित केलेले नाही. आमच्याकडे नवीन चेहरे तसेच अनुभवी लोक सुद्धा आहेत.