New Year 2024: येत्या नवीन वर्षात जगाची लोकसंख्याही नवा विक्रम करणार आहे. या वर्षी जगाची लोकसंख्या अंदाजे 7.5 कोटींनी वाढली आहे. नवीन वर्षाच्या दिवशी एकूण जागतिक लोकसंख्या आठ अब्जांपेक्षा जास्त होण्याची शक्यता आहे. यूएस सेन्सस ब्युरोने जारी केलेल्या आकडेवारीत ही माहिती देण्यात आली आहे. सेन्सस ब्युरोच्या आकडेवारीनुसार, गेल्या वर्षी जगभरातील लोकसंख्या वाढीचा दर एक टक्क्यांपेक्षा कमी होता. 2024 च्या सुरुवातीस, असा अंदाज आहे की जगभरात 4.3 लोकांचा जन्म होईल आणि दर सेकंदाला दोन लोक मरतील.

अमेरिकेच्या लोकसंख्येची स्थिती काय आहे?

दरम्यान, गेल्या वर्षी अमेरिकेचा लोकसंख्या वाढीचा दर 0.53 टक्के होता, जो जगभरातील विकास दराच्या निम्मा आहे. अमेरिकेची लोकसंख्या यावर्षी 17 लाखांनी वाढली असून नवीन वर्षात तिची एकूण लोकसंख्या 33 कोटी 58 लाख होईल. ब्रुकिंग्स इन्स्टिट्यूटमधील लोकसंख्याशास्त्रज्ञ विल्यम फ्रे यांनी सांगितले की, लोकसंख्या वाढीचा सध्याचा वेग या दशकाच्या अखेरपर्यंत कायम राहिला तर 2020 हे दशक लोकसंख्या वाढीच्या दृष्टीने अमेरिकेच्या इतिहासातील सर्वात मंद दशक ठरु शकते. 10 वर्षांच्या कालावधीत 2020 ते 2030 पर्यंत विकास दर चार टक्क्यांपेक्षा कमी राहू शकतो. 1960 पासून जागतिक लोकसंख्या वाढीचा वेग मंदावला आहे. जागतिक लोकसंख्या सात अब्जांवरुन आठ अब्जांपर्यंत वाढण्यास साडे बारा वर्षे लागली. परंतु सेन्सस ब्युरो सांगते की, आठ अब्ज वरुन नऊ अब्ज पर्यंत जाण्यासाठी 14.1 वर्षे लागतील आणि नऊ अब्ज वरुन 10 अब्ज पर्यंत जाण्यासाठी 16.4 वर्षे लागतील, जे 2055 च्या आसपास होऊ शकते.

भारताने आघाडी घेतली

दुसरीकडे, यावर्षी भारत लोकसंख्येच्या बाबतीत चीनला मागे टाकून जगातील सर्वाधिक लोकसंख्येचा देश बनला आहे. संयुक्त राष्ट्रांच्या (UN) अंदाजानुसार भारताची लोकसंख्या 142.86 कोटींच्या पुढे गेली आहे. पुढील तीन दशकांत भारताची लोकसंख्या वाढतच जाईल आणि नंतर ती कमी होण्यास सुरुवात होईल, असा यूएनचा अंदाज आहे. 2011 पासून भारतात जनगणना झालेली नाही आणि त्यामुळे 2023 मध्ये तिची नेमकी लोकसंख्या माहीत नाही.