Putin Warns Trump On India Relations: जागतिक राजकारणातून एक अत्यंत मोठी आणि भारताच्या दृष्टीने महत्त्वाची बातमी समोर येत आहे. रशियाने आंतरराष्ट्रीय स्तरावर भारताची बाजू घेत उघडपणे पाठिंबा दर्शवला. रशियाचे राष्ट्राध्यक्ष व्लादिमीर पुतिन यांनी भारताच्या स्वतंत्र परराष्ट्र धोरणाचे आणि पंतप्रधान नरेंद्र मोदी यांच्या नेतृत्वाचे भरभरुन कौतुक केले. याचवेळी त्यांनी अमेरिकेचे राष्ट्राध्यक्ष डोनाल्ड ट्रम्प यांना भारताच्या संदर्भात एक कडक आणि थेट इशाराही दिला.

पुतिन यांनी भारताचा गौरव करताना म्हटले की, भारत हा एक सार्वभौम देश असून रशियाचा सर्वात समजूतदार मित्र आणि अत्यंत विश्वासू सहकारी आहे. आज भारत हा जगातील एक प्रमुख आणि अग्रगण्य आर्थिक शक्ती बनला असून रशियासोबतचे त्याचे संबंध कमालीचे घट्ट आहेत.

सेंट पीटर्सबर्ग येथे जगातील आघाडीच्या वृत्तसंस्थांच्या प्रमुखांसोबत घेतलेल्या एका विशेष बैठकीत पुतिन यांनी भारत (India), अमेरिका आणि पाकिस्तान या देशांबाबत रशियाची भूमिका स्पष्ट केली. पाश्चात्त्य देश, विशेषतः अमेरिका, भारत आणि रशिया यांच्यातील वाढत्या सहकार्यावर सातत्याने दबाव आणण्याचा प्रयत्न करत आहे. या पार्श्वभूमीवर पुतिन यांनी अमेरिकेला सुनावले की, पंतप्रधान नरेंद्र मोदी यांच्यावर कोणत्याही प्रकारचा बाह्य दबाव आणण्याचा प्रयत्न करणे पूर्णपणे निरर्थक आहे.

अमेरिकेने भारतावर आणि त्यांच्या नेतृत्वावर दबाव आणण्याचा प्रयत्न केल्यास, त्याचे परिणाम स्वतः अमेरिकेच्या (America) आंतरराष्ट्रीय आणि द्विपक्षीय संबंधांसाठी हानीकारक ठरतील. भारत आणि रशियाचे संबंध विश्वासाच्या मजबूत पायावर उभे असून कोणताही बाह्य दबाव किंवा अमेरिकेचे राष्ट्राध्यक्ष ट्रम्प हे संबंध बिघडू शकत नाहीत.

अमेरिकेने भारतावर रशियाकडून कच्चे तेल खरेदी करण्याबाबत अनेकदा दबाव आणला. मात्र, पुतिन यांनी स्पष्ट केले की, भारताचे रशियासोबतचे संबंध केवळ कच्च्या तेलाच्या खरेदीपुरते मर्यादित नाहीत. जर भारताचे इतर देशांसोबत सहकार्य वाढत असेल, तर त्याचा रशियासोबतच्या संबंधांना कोणताही धोका नाही. भारत नेहमीच आपल्या राष्ट्रीय हितांना सर्वोच्च प्राधान्य देऊन निर्णय घेतो आणि हेच त्याचे वैशिष्ट्य आहे.

रशिया आणि भारतामधील द्विपक्षीय संबंध केवळ टिकून राहणार नाहीत, तर ते भविष्यात अधिक मजबूत होत राहतील, असे संकेत पुतिन यांनी दिले. येत्या काही वर्षांत दोन्ही देशांमधील द्विपक्षीय व्यापार 100 अब्ज डॉलर्सच्या टप्प्यापर्यंत पोहोचू शकतो, असा विश्वासही त्यांनी व्यक्त केला. पुतिन यांच्या या विधानामुळे जागतिक स्तरावर भारताची परराष्ट्र नीती किती स्वावलंबी आणि मजबूत आहे, हे पुन्हा एकदा सिद्ध झाले असून अमेरिकेला स्वतःच्या मर्यादांची जाणीव करुन देण्यात आली.